Astindu Bergarako Fanzinea

AHTren OBRAK LUKUN ZABALTZEN ARI DIRA!

URBINAKO HERRI-LURREN DESJABETZAPENA

EKAINAREN 19AN LEGUTIOKO UDALETXEAN

Ekainaren 16ean larunbatean bilera egingo da Gasteizen

salaketa ekintza bat antolatzeko

            AHTren obrak Lukun nabarmen zabaltzen hasi dira, autopistaren azpian egin zuten zementuzko “pasabidea”ren aldeetara. Batetik, Lukuko tunelaren frontean desmonte eta exkabazio lan handia egiten ari dira; eta bestetik, zementuzko “pasabide”aren bestaldera dagoen zelaiaren gainean “terraplen” zabala betetzen ari dira. Lanen tamaina ikusita, lan hauek duela zenbait aste azkartu egin dituztela dirudi. AHTren obrak kilometro bateko luzeran hedatzen dira orain.

            Gainera, datorren ekainaren 19an, Urbinako herria bete-betean harrapatzen duen AHTren zatiaren lurrak okupatu aurreko desjabetzapen aktak jasotzeko (“levantamiento de actas previas a la ocupación de terrenos” delakoa) ekintza administratiboa agindu du Espainiako Sustapen Ministerioak, Legutioko Udaletxean. Aipagarria da, hainbat partikularren lurrekin batera, Urbinako herri-lurren “desjabetze forzosoa” ere egingo duela egun horretan.

            Horregatik, AHTren aurkako mugimenduak egoera hauei eman beharreko erantzuna  aztertzea beharrezkoa iruditzen zaigu, eta datorren ekainaren 16ean, larunbatarekin, bilera batera dei egiten dugu Gasteizen, eguerdiko 12etan, Zaramaga auzoko “Zaramazulo” lokalean (K/ Puerto Barazar 1-behea-atzekaldea).

Lehenik eta behin, aspaldiko lagunak. Denbora luzean isilik egon eta gero, hemen da Astindu berriz ere, herri komunikazioan bere lekutxoa egiteko asmoarekin. Hau, aro berriko lehenengo alea denez, aldizkari honen nondik norakoak, asmoak eta helburuak azaltzea tokatzen dela uste dugu.

Aldaketak daude bai, berritu ala hil! Formatuarena da aldaketa nagusia, ohiko fanzinearen formatuak xarma gehiago izango zuen agian, baina gure apustu handiena aurrera eramateko, beharrezkoa ikusi dugu berritzea. Alde batetik, jorratutako gaiek freskotasuna mantentzeko gertutasuna lortuz eta bestetik, kalean presentzia izateko errazago eta maizago banatuko den zerbait eskaintzea; beti ere ikuspegi kritiko batetatik egina.

Dakizuen bezala, Astindun ez dago zuzendaririk ezta iragarkietarako lekurik ere, proiektua aurrera eramateko sortutako koordinazio talde eta motore bat baizik. Bere edukia anitza izateko denoi zabalduta dago. Denon ekarpenekin errazago eta aberatsagoa izango delako, denoi eta batez ere beste medioetan ahotsik ez dutenei tartea utziz.

Ba hori, ez garela profesionalak eta autogestioan sinisten dugula, eta honek denok ideiak, ametsak, kontuak, istorioak eta ezagupenak elkartrukatzeko sortutako espazio bat izan nahi duela. Kopiatu, zabaldu eta sortu!