2009-04-07

Baztanen euskara are eta indar handiagoz sustatzeko helburuarekin, lankidetza hitzarmena berritu dute Baztango udalak eta Kontseiluak. Duela sei urte hasi ziren elkarlanean Baztango udala eta Kontseilua, eta lortutako emaitza onak ikusita, bide beretik jarraitzea erabaki dute.

"Administrazio eta entitateek arduraz jokatu behar dugu eta hizkuntza politika eraginkorrak indarrean jarri behar ditugu. Euskaraz bai dinamikaren bidez horretan eragiteko markoa eskaintzen digu Kontseiluak eta hitzarmen honen bidez bide beretik jarraitzeko ardura berresten dugu", adierazi du Baztango euskara zinegotzi Martin Gardek.

Xabier Mendigurenek, Kontseiluaren idazkari nagusiak, lankidetza hitzarmena berritzeagatik poza adierazi du. Apurka Euskaraz bai txoko guztietara zabaltzen ari dela nabarmendu du Mendigurenek "igandean amaitu zen Korrikak ere lau haizetara zabaldu du mezu hori, euskaraz bizi nahi dugula, alegia."

Lanean jarraitzeko deia eta gonbidapena ere luzatu ditu Kontseiluaren idazkari nagusiak. "Jakina da Kontseiluak 10 urte egin zituela aurreko urtean eta lan itzela egin dugu. Txalupa bikaina osatu dugu guztion artean, ederki egin dugu boga, eta arraun egokiak ditugu gure lana bultzatzeko. Hurrerago ditugu orduan jarritako helburuak. Baina oraindik ez dugu modurik euskaraz bizitzeko. Beste aupada bat behar dugu. Horregatik, 'Euskaraz bai' leloa. Argi gera dadin euskaraz lan egin nahi dugula, euskaraz egin nahi dugula etxean eta lagunartean, euskaraz ikasi eta irakatsi nahi dugula, administrazioarekin harremanak euskaraz nahi ditugula…", azaldu du.

Epe laburrean abiatuko den dinamika nazionalaren aurrerapena ere egin du Mendigurenek. Aseguru-etxeetan eragiteko plana egin du Kontseiluak eta egun batzuk barru aurkeztuko badu ere, Baztango euskalgintza eta udalarekin elkarlanean arituko direla aurreratu du.

Oianko Gardek, Euskaraz bai dinamikaren teknikariak eman ditu xehetasun gehiago. "Abian jarriko dugun kanpaina honek aseguru-etxeek eskaintzen diguten zerbitzua euskaraz ere jasotzea du helburu. Izan ere, aseguruak derrigorrez izan beharreko dokumentuak dira eta nagusiki gaztelaniaz jaso ohi ditugu". Eskaerak era guztietako entitate (taberna, komertzio, elkarte…) eta norbanakoek egiteko aukera egonen da.

Aipatu kanpaina, apirilean hasi eta ekaina bitarte luzatuko da. Amaitzeko, jende guztiak dinamika honetan parte hartzera gonbidatu dituzte agerraldian.

      57 Bai Euskarari Ziurtagiri banatu dira   

Baztanen 

                                                              Ekainaren 14an egindako ekitaldian hainbat eragilek parte hartu zuen

TTIPI-TTAPA - Núm. 473 - 26/06/2008

                                                Baztan. -- 57 enpresa, saltoki eta era guztietako entitatek eskuratu dute aurten Bai Euskarari

Horietatik seik Zerbitzua eta lana euskaraz maila lortu dute; 23k Zerbitzua euskaraz maila; eta 28k Bidean maila. Ekainaren 14an egin zen ekitaldian Xabier Mendiguren Ziurtagiriaren Elkarteko bokalak duela bortz urte Baztanen Bai Euskarari Akordioa abiatu zenetik egin diren urrats esanguratsuak azpimarratu zituen.

Martin Garde, Baztango euskara zinegotzia, Maria Mendiburu Baztan ikastolako irakaslea eta euskalgintzako ordezkaria, eta Eva Olaizola Elizondoko Gaztetxeko kidea eta eragilea ere ekitaldian izan ziren. Eurek ere euskararen normalizazioaren bidean urratsak ematen jarraitzeko beharra nabarmendu zuten.

Klikatu bertan eta gure iragarkia ikusi!!!!

http://es.youtube.com/watch?v=dOJVbx4RDFQ

Baztango Udalaren Euskara Zerbitzuaren ekimenez

Euskararen erabilera emendatzeko

Raul Lopez, Baztango Euskara teknikariaren erranetan, “neska-mutikoak ikastetxetik ateratzen direnean, normalki gurasoak eta haurrak ondoko parkean edo eguraldi txarra egiten badu, frontoian biltzen dira. Gurasoak kontu kontari eta haurrak jolasean aritzen dira. Kasu aunitzetan gurasoak kontu kontari erdaraz aritzen dira elkarren artean, eta nahiz eta umeari euskaraz egin, hauek ohartzen dira gurasoek zer hizkuntza erabiltzen duten. Horrekin hizkuntza erabiltzeko araua ezartzen diegu umeei. Hori hausteko eta euskararen erabilera emendatzeko antolatu dugu plaza jostaldia”.

Arantxa Gamio berroetarra begirale

Berroetako Arantxa Gamio ariko da begirale gisara, eta beharraren arabera, Haur Eskolan aritzen diren bertze bi begirale izanen dira, “honelako gaietan esperientzia dutenak”.

Matrikulazio joera:

	93-94	94-95	95-96	96-97	97-98	98-99	99-00	00-01	01-02	02-03	03-04	04-05	05-06	06-07	07-08
D	48 % 90,5	48 % 72,7	51 % 83,6	55 % 91,6	48 % 85,7	54 % 87	50 % 92,6	46 % 90,2	57 % 92	54 % 96,4	68 % 89,5	66 % 95,7	75 % 94,9	67 %87	95 %99
A	5 % 9,5	18 % 27,2	10 % 16,3	5 %8,3	8 % 14,3	8 % 13	4 % 7,4	5 %9,8	5 %8	2 % 3,5	8 % 10,5	3 % 4,3	4 % 5,1	10 %13	1 %1

Euskaraz aritzeko solas-lagun   

bila Bortziriak, Baztan eta Malerrekan

TTIPI-TTAPA - Zbk. 456 – 2007/10/18

Euskaraz solasteko lagunak behar dira. Horixe da hain zuzen Solas-laguna egitasmoaren gakoa. Hizkuntza bat ikasteko modurik eraginkorrena erabiltzea delako, euskaldun berriei horretarako aukera ematea da Solas-lagunaren helburua. Euskara ikasten ari direnei hizkuntza praktikatzeko aukera eman nahian, euskaraz dakitenei «bertze lagun batzuei euskaraz egoki solasten laguntzeko» deia egin dute Bortzirietan, Baztanen eta Malerrekan. Hala adierazi zuten antolatzaileek joan den urriaren 10ean Beran egindako aurkezpenean. «Euskara ikasten ari direnak erabilerarako pausoa ematea, eta euskaraz solasteko lotsaren muga psikologikoa gainditzea», horiexek egitasmoaren ardatzak, eta baldintza bakarra «euskaraz aritzea». Izan ere, Baztan, Bortziriak eta Malerrekan euskara nekez dakiten 1.827 lagun daude eta horiek euren gaitasuna hobetzeko aukera euskaraz ongi dakitenen esku dago (16.595 lagunek ongi dakite euskaraz). Izen ematea Bortziriak, Malerreka eta Baztango Euskara Mankomunitateetan eta euskaltegietan egin beharko da.

«Hizkuntza bat ez da galtzen, ez dakitenek ikasten ez dutelako, dakitenek erabiltzen dutelako baizik». Artzeren esaldi ospetsua. Bistan da erabilerak egiten duela hizkuntza bat bizi, eta erabiltzen ez den hizkuntzaren patua desagertzea dela. Dena den, hizkuntza ikasten dutenek ere, hizkuntza indarberritu egiten dute. Mintza-laguna, Berba-laguna... Eta gurean Solas-laguna. Euskal Herriko hainbat lekutan martxan paratu ondotik, ailegatu zen Solas-laguna egitasmoa Bortzirietara. Otsailean izan zen hori. Orain, berriz, ikasturte berriarekin batera Baztan eta Malerrekara ailegatu da euskararen mintza praktikak egiteko proiektua. Egitasmoak euskara ikasleei euskal hizktunekin solasteko aukera eman nahi die, hartara, euren irakaskuntza prozesuari bultzada emateko. Bidenabar, euskaldunek aukera izanen dute gizarte osoaren euskalduntze prozesuan eragile aktibo izateko.

Gero eta jende gehiago dira, euskaltegietan izena ematen dutenak, euskara maila hobetu nahi dutelako, herriarekiko edo kulturarekiko lotura sentitu dutelako edo lanagatik. Arrazoi bat edo bertze bat tarteko, eta horiek ere aukera berri bat merezi dutelako Solas-laguna proiektuan parte hartzeko euskal hiztunak behar dira. Izan ere, euskaraz jakin arren, solasteak lotsa ematen die aunitzei eta hori gainditzea ere helburu nagusia da. Horregatik, euskaraz batzuk bertzeek baino gehiago dakitenak taldean biltzea da asmoa. Otsailean Beran bi talde elkartu ziren, eta bakarra Lesakan. Ikasturte berriaren atarian, eskaintza berriro zabalik dago. Mankomunitatea taldeak egiteaz arduratuko litzateke, eta partaideak elkarrekin harremanean jartzeaz. Gainerakoan, taldekideek eurek adostuko lukete zertarako elkartu (mendira joateko, kirola egiteko, kultur ekitaldi batera joateko, kafea hartzeko...). Guttienez astean behin eta ordu batez elkartuko ziratekeen. Horretarako, interesatuek ondoko taulan adierazten den lekuetan eman beharko dute izena.

Mankom

Datuak Baztan, Bortziriak eta Malerrekan

Mankomunitateetako ordezkariek utzi dizkiguten datuen arabera, badago zeregina, eta erdaldunak euskararen mundura erakartzea gure esku ere badago. Baztan, Bortziriak eta Malerrekako datuei erreparatuz gero, euskaraz ongi dakitenen kopuru baxuena Baztanek du, baita euskaraz nekez egiten dutenen eta ez dakitenen kopuru altuena ere; altuena Malerrekan. Baztanen populazioaren %76,7ak ongi daki euskaraz; %14,7ak nekez daki euskaraz; eta gainerako %8,6ak ez daki euskaraz. Zehazki, Baztanen 767 lagunek nekez daki euskaraz, eta 5.510 lagunek ongi. Bortzirietan, euskaraz ongi dakitenen kopurua %81,6koa da; nekez dakitenena %9,9koa; eta ez dakitenena 8,5 puntukoa. 789 lagunek nekez baitakite euskaraz Bortzirietan. Euskaraz ongi dakitenenak, berriz, 6.498 dira.
Portzentajerik baikorrenak Malerrekan topatu ditugu: %86,4ak ongi daki euskaraz (Baztanen baino ia %10 gehiagok); nekez egiten dutenen kopurua %5,3koa da; eta ez dakitenena %8,3koa. Malerrekako 271 lagunek nekez egiten dute euskaraz, eta ongi dakitenak 4.387 dira. Hiru eskualdeko datuak aintzat hartuz, 1.827 lagunek nekez egiten dute euskaraz; eta 16.595ek ongi.
Datuok ikusita, euskara gure hizkuntza delako eta muga guztien gainetik gurea denarekin egin behar dugulako aitzinera.