KORRIKA 17 BADATOR!

"KORRIKA NABARRIKA"

Aurreko barikuan, 5 berbaizukide Nafarrorantz abiatu ginen, KORRIKAren berotasuna gertutik ederto bizitzeko. Ederra eta oso hunkigarria izan da esperientzia. Sekulakoa!!!!!
                                                                                                   

Arrastiz Iruñara jun ginen, Euskal Herriko hiriburura. 11ak aldera, Alde Zaharretik Korrikak ustekabean hartu gintuen (tragua atera berri eskuetan) eta entzierroa bailitzan egin genuen korrika. Erorketa bat eta guzti egon arren, Korrika arina eta garbia izan zen hura. Ondoren, poztasunez pote batzuk hartu genituen, eta oraingoan gorputza musikaren erritmoz mugitu genuen.

Bertan lo egin eta hurrengo egunean, altxatu eta eguerdiz Los Arcos herrian hasi ginen txirrindulaz. Hasi eta ezin amaitu! 4-5 ordu ibili ginen bizikletaz, bero handia egiten bazuen ere, jarraitu eta jarraitu egin genuen Sartagudaraino.



Aurretik: Lodosa, Mendabia, Lazagurria herriak zeharkatu genituen. Errepidetako eta herrietako giroa bikaina zen! Lekukoa hartzen zuten adin guztietako pertsonen aurpegien argazkia behin eta berriro errepikatzen zen: poztasuna, alaitasuna eta harrotasuna.


    

"Gora Nafarroa euskaldun!!!" Halako giroa egonda nola geldi genezakeen gure martxa?




6ak aldera, Sartagudatik bueltan utzi genuen Korrika penatuta, baina agur polita egin ziguten furgonetatik: "Aupa Berbaizuko lagunak, agur!" Lodosan igerilekura jun ginen, gorputza ondo erlaxatu eta ederto afaldu ostean (gure buruei omenalditsua eman genien), gaueko 11:30etan prest geunden berriz martxa hartzeko. Txalekoak jarri, argiak piztu eta "Pausoz Pausu gelditu barik..." musikaren atzetik, Cadreita herritik, abiatu ginen txirrindulariok. Gauez ere giro ederra. Errepide bazterrik jendea saltoka zain, eta holan berriro lekukoa esku batetik bestera pasatzen ikusi genuen. Castejonera heldu orduko talde txikia talde handia bihurtu zen. Herriko giro apartak ongi etorria eman zion Korrikari. Handik aurrera, gaua pixka bat konplikatu zen. Pikoloek ez zuten giroa alaituko: Korrika gelditu, txalekoa ez zeramatenei isuna jarri, bide bazterrean geldiarazi... Hala ere, argi dago Korrikak ederto ekin ziola berriz ere! Batzutan euskalakari taldetsugaz, beste batzutan txirrindulari bikoteak eraman zuen lekukoa. Zeharkatu zituzten hurrengo herriak: Cintruenigo eta Tutera (Erriberaren bihotza). Horietan ere jende andana zain zegoen. Goizeko 4ak pasata ziren eta hortxe bukatu zen berbaizukideon lasterketa. Batzuk furgonetan lotan geunden jada, bikote ausartak ederto hartu zuen loa orduan.
 
Bueltan, buruan mezu hau ondo grabatua ekarri dugu, ordea: Maitatu, ikasi, ari... euskalakari!!!!
 
Laster Korrika 17.na gurean izango da, beraz, ondo berotu gorputzak!