Emakumea Pilotari

Gipuzkoako eskolarteko paleta txapelketa. Asteburu honetan bai!

emakumeapilotari — Thu, 09 Feb 2012 22:18:13 +0100

Iragan astebururako iragarri genizuen gure txoko honetatik Gipuzkoako eskolarteko paleta txapelketaren hasiera. Eguraldi txarra zela medio, ordea, bertan behera utzi zituen Eusko Jaurlaritzak eskola kiroleko jarduera guztiak. Horregatik, asteburu honetan ekingo zaio txapelketari.

Informazio gehiago nahi izanez gero, hona hemen Gipuzkoako Euskal Pilota Federazioko web gunerako lotura: eskolarteko txapelketa

Bertan dituzue kategoria bakoitzeko jardunaldi bakoitzeko partidak, emaitzak, saikapenak, etab.

Ondo pasa!

Euskal Herriko Nesken Gomazko Paleta Txapelketa. 3.jard.

emakumeapilotari — Thu, 09 Feb 2012 22:10:25 +0100

Asteburu honetan, larunbatean, hilak 11, jokatuko dira 3.jardunaldiko norgehiagokak, ohi bezala, Euskal Herrian zeharreko hiru pilotalekutan. Lehen mailakoek Mallabia eta Orion izango dituzte hitzorduak, 16.30ean hasita. Bigarrenekoak, aldiz, Gasteizko Abetxukon arituko dira nor baino nor, 16.00etan hasiko den jaialdian.

Ligaxkako azken partidak dira, gainera, aurrera nortzuk egingo duten erabakigarriak. Momentuz, esan digutenaren arabera, ez dirudi iazko ediziotik aldaketa handiegirik izango denik.

Bide batez, iragan asteburuan elur eta eguraldi traketsa medio jokatu gabe geratu ziren hainbat partida astean zehar jokatzekotan dira pilotariak, elkarren artean adostu bezala.

Zorte on eta kontuz izoztu gabe!

Emakumeen Gomazko Paletako Kutxa Saria 2012. 2.jard.

emakumeapilotari — Thu, 09 Feb 2012 22:02:15 +0100

Urtarrilaren 29an jarri zen abian Emakumeen Gomazko Paletako Kutxa Saria 2012. Astebeteko etenaldiaren ostean asteburu honetan, igandean, hilak 12, berrekingo zaio txapelketari. Jarraian duzue Zarauzko Aritzbatalden jokatuko diren partiden berri.

PROMOZIO SARIA
1	Andueza-Ugalde	Garmendia-Senper
KUTXA SARI NAGUSIA
2	Muneta-Bordagaray	Irazustabarrena-Arozena
3	Aristorena-Ruiz De Larramendi	Mendizabal-Arriet

Jaialdia goizeko 10.30ean hasiko da eta hiru partidaz gozatzeko aukera izango dute bertaratzen direnek. Lehena gazteen mailan aurten antolatu den txapelketa berrikoa da eta bi eta hirugarrenak goi-mailakoenak izango dira.

1. partida

ANDUEZA-UGALDE / GARMENDIA-SEMPER

Promozio Sarian ligaxkako aurreneko partida izango da bikote gorriarentzat eta bigarrena eta azkena urdinentzat. Azken hauek garaipen batekin eman diote hasiera txapelketari eta igandean irabazteak multzo buru izatea eta finalerako txartela poltsikoan izatea baimenduko lieke. Bikote gorriak ere garaipenaren bila irteteko asmoa izango du, ordea, lehen bi postuetan sailkatuz gero Beotibarreko final preziatuan jokatzeko modua izango bailukete. Beraz, lehia parekatu eta gogorra espero da. Bi atzelariak hernaniarrak dira, eskola berekoak, elkar ondo ezagutzen dutenak. Garmendia ere gipuzkoarra da, alegiarra, eta Andueza, berriz, nafarra. Aurrelarien erabakitzeko ahalmenak desoreka lezake balantza, agian.

2. partida

MUNETA-BORDAGARAY / IRAZUSTABARRENA-AROZENA

Jaialdiko bigarren neurketan Irazustabarrena gazteak egingo du debuta goi-mailako tankera honetako txapelketa batean. Aurrean, berriz, esperientzia handiko eta palmares dotoreko bikotea izango du, Muneta beterano nafarrak eta Bordagaray behe nafartarrak osatua. Hauek ligaxkako euren azken partida izango dute eta garaipenaren bideari jarraitzeko asmoz kantxaratuko dira, lehen jardunaldian partida gogor eta emozioz beterikoan garaipena lortu ostean, tanto bakar batez, 30-29, Villabonan. Elkar ongi ezagutzen dute eta hori izan dezakete alde.

Bikote urdinak lehendabiziko partida izango du eta Nagore Arozena atzelaria lanerako prest kantxaratzea espero da, ohi bezala, partidari eusten saiatu eta bere kideari ahalik eta gehien lagundu asmoz. Ez da alferrik Munduko txapelduna. Beraz, ezin da pronostiko argirik eman partida honen inguruan ere, maila parekatua espero baita. Ea urduritasunak ez duen protagonismo handiegirik hartzen.

3. partida

ARISTORENA-RUIZ de LARRAMENDI / MENDIZABAL-ARRIETA

Jaialdia ixteko partidan ere esperientzia eta gaztetasuna izango dira aurrez aurre, neurri batean, bederen. Izan ere, Ruiz de Larramendi eta Mendizabal ia hogei urtez goi mailan ari diren pilotariak dira, nazioarte mailan lor litezkeen garaipenik handienak etxeratutakoak. Guztiz ezberdina da Aristorena eta Arrietaren kasua, ordea, Kutxa Sari Nagusian estreinakoz ari direlako parte hartzen. Hortaz, elkar ondo hartzeak eta ulertzeak garrantzia izan dezake partida honetan ere. Bikote gorriak edizio honetako lehen partida izango du eta urdinak bigarrena. Azken hauek garaipena eskuratuta datoz eta hala jarraitu nahiko lukete. Beraz, ikusi egin beharko da nola erantzuten duten lau pilotariek.

Goi mailako era honetako partidak etxe ondoan izatea ez da erraza izaten. Hortaz, nahi duen oro ongi etorria izango da. Igandera arte!

Euskal Herriko Nesken Gomazko Paleta Txapelketa. 1.jard.

emakumeapilotari — Wed, 01 Feb 2012 22:52:55 +0100

Iragan larunbatean, urtarrilak 28, jarri zen abian Euskadiko Euskal Pilota Federazioak antolatzen duen txapelketa honen aurtengo edizioa eta jaso berri ditugu lehen jardunaldian jokatu ziren partidetako emaitzak. Hona hemen:

*1.taldea*	*Emaitza*	*2.taldea*
PRADERA-SAEZ	30-8	N.-G.MARTINEZ
GARMENDIA-MENDIZABAL	30-21	GOIKOETXEA-HUICI
ETXARRI-MARIÑELARENA	10-30	MARTIN-ISASMENDI
LEUNDA-M.RUIZ	19-30	IRAZUSTABARRENA-ARRIETA
EVARISTI-ARGAIN	30-19	LANDALUZE-AGIRRE
REDONDO-ETXABE	10-30	CONTIN-ARISTORENA
ETXANIZ-GALLASTEGI	30-7	BAÑALES-URKIZU
TIJERO-GUTIERREZ	30-13	MARTINEZ-VALCARLOS
JAUREGI-LUCAS	30-29	SANTXEZ-AGIRRE
EIZAGIRRE-LASARTE	30-27	TXURRUKA-URIARTE

Asteburu honetan jokatuko dira 2.jardunaldiko norgehiagokak Mallabia, Gasteiz eta Leitzako pilotalekuetan. Lehen bi jaialdiak lehen mailari dagozkio eta bakoitzean hiruna partida jokatuko dira 16.30ean hasita. Hirugarrena, aldiz, bigarren mailakoa, 16.00etan hasiko da.

Izoztu gabe ibili!

Gipuzkoako eskolarteko paleta txapelketa

emakumeapilotari — Wed, 01 Feb 2012 22:42:13 +0100

Asteburu honetarako dago iragarrita 2011-2012 ikasturteko Gipuzkoako eskolarteko paleta txapelketaren hasiera. Beraz, neguaren bihotzean hasi eta udaberriaren bihotzean amaituko da eskola adinekoei zuzenduriko lehiaketa hau.

Parte hartzearen eta taldeen izenematearen berri jarraian:

*Kategoria*	*Taldeak*
Alebin neskak	Joxemiel 6a Joxemiel 6b Elizalde Joxemiel 5 Txinkorta A Txinkorta B Urumea Langile Imaz Bertsolaria Astigarraga
Alebin mutilak	Oiartzun 1 Oiartzun 2 Imaz Bertsolaria Elizalde Ikasberri Lardizabal-Aia Asteasu
Infantil neskak	Lizardi-Aia Lizardi B Hernani Bhi B Hernani Bhi C Aralar 1 Erniobea A Loinazpe-Ataun
Infantil mutilak	Oianguren A Oianguren B Jakintza Oianguren Bhi
Kadete neskak	San Benito-Ataun Lizardi-Aia Landaberri

Hasiera batean, behintzat, partida gehienak larunbat arratsaldetan jokatzea dago aurreikusita. Txapelketak aurrera egin ahala emango dizuegu honen berri tarteka-marteka txoko honetan ere.

Ondo pasa!

Emakumeen Gomazko Paletako Kutxa Saria 2012. 1.jard.-Kronika

emakumeapilotari — Mon, 30 Jan 2012 19:06:21 +0100

Atzo bertan, urtarrilaren 29an, jarri zen abian Villabonan Emakumeen Gomazko Paletako Kutxa Saria 2012. Goizeko 10:30ean hasitako jaialdia hiru norgehiagokek osatu zuten. Jarraian dituzue emaitzen taula eta iruzkina.

1.bikotea	Tantoak	Tantoak	2.bikotea
Garmendia-Semper	30	24	Isasmendi-Mendizabal
Mendizabal-Arrieta	30	23	Housset-Serre
Etchelecu-Contin	29	30	Muneta-Bordagaray

Hasiera parekatu, lehiatu eta gogorra eman diote neska pilotariek txapelketa honen 5.edizioari. Aurten, gainera, gazteei ere aukera eman zaie goi-mailako txapelketa honetan parte hartzeko eta erantzun ona eman dute hasiera honetan, bederen.

1.partida

Promozio Sariko aurreneko norgehiagoka luzea, ia ordubeteko iraupena izan zuen, eta parekatu xamarra izan zen azken txanpara arte. Bikote urdina, Isasmendi-Mendizabal, izan zen markagailuan nagusi partida erdira arte (10-15), baina, gorriek, tantoak lortu eta 16na berdintzea lortu zuten, lanean jarraitzeari esker. Oso orekatua izan zen 21na arteko zatia ere, baina, hortik aurrera gorriek nagusitzea lortu zuten eta atzelari urdina nekarazita, besteak beste, horma biko eder batekin eman zioten amaiera euren partidari: 30 eta 24.

Honenbestez, partida banaren faltan urrats txiki bat eman dute Garmendia eta Semperrek aurrera begira. Urdinek ere hurrengo partida irabaziz gero aukerak izaten jarraituko dute, hau hasi baino ez baita egin.

2.partida

Kutxa Sari Nagusiko lehen norgehiagokan hiru esperientzia handiko pilotari eta etorkizunean zeresana eman dezakeen gazte bat izan ziren parte hartzen. Izan ere, Arrietak 16 urte egingo ditu aurten. Hortaz, ikusmina bazegoen haren maila ikusteko, nahiz eta aurrean pilotari beterano bezain abil baten babesarekin aritzeak lasaitasun puntu bat eman dezakeen, ez baita edonor Maider Mendizabal anoetarra.

Hiru ordun laurden inguruko partida polita jokatu zuten lau pilotariek eta Maider Mendizabal nabarmendu zen guztien gainetik. Izan ere, 17 tanto eskuratu zituen, bere mailaren eta ahalaren arrastoa utzita. Ariane Arrietak ere eutsi zien aurkarien pilotakada indartsu eta bortitzei eta itxura ona eman zuen. Bikote urdinak, berriz, atzean jokatu zuen nagusiki, Housseten kolpe bizia eta Serren indarraz baliatuta aurrelari gorria buruz gain pasa nahian. 22nako berdinketara arte lehia orekatua izan zen hau ere, baina, azken txanpan gorriek zuloa ireki eta horma biko dotore baten bidez amaitu zen partida: 30-23.

3.partida

Jaialdia ixteko azken partida izan zen gogorrena, nabarmen. Ordu eta hogei minutuko iraupena izan zuen eta tantoak luze, neketsu bezain landuak izan ziren. Gainera, azken tantoan erabaki zen zein bikotek eskuratuko zuen ligaxkako lehen puntua, emozioa puri-purian jarriz. Kasu honetan ere Contin nafar gazteak emango zuen mailak sortu zuen zeresana, mota honetako txapelketa batean bere lehen parte hartzea baitu. Honek maila oso ona eman zuen eta Amaia Etchelecu aurrelari lapurtarrarekin batera bikote ona osatzen dutela erakutsi, azken honek pilota zailak jasotzeaz gain asko lagundu baitzion kideari. Muneta ere esperientzia handikoa da eta atzera pilotakada ederrak bidali zituen (tartean hiru errebote), aurrelari gorria ekidin asmoz. Bordagarayk eta biek elkar oso ongi ulertu zuten eta azken txanpara aldetxoarekin heldu ziren: 25-29. Azken berdinketa 20nakoa izan zen ordura arte. Hala ere, bikote gorriak ez zuen etsi eta 29-29 jartzea lortu zuten. Amaieran, ordea, urdinek etxeratu zuten puntua: 30-29.

Ongi hastea garrantzitsua bada ere, batez ere ligaxkan bikote bakoitzak bina partida baino ez dituela aintzat izanik, oraindik ere asko falta da eta denek dute aurrera egiteko aukera. Hori bai, batzuk besteek baino beharrezkoago izango dute garaipena aukerak mantendu nahi izanez gero.

2. jardunaldiko partidak otsailaren 12an jokatuko dira, ordu berean hasita.

Emakumeen Gomazko Paletako Kutxa Saria 2012. 1.jard.

emakumeapilotari — Fri, 27 Jan 2012 11:47:50 +0100

Atzo aurkeztu zen eta etzi hasiko da aurtengo edizioa, Villabonako Behar Zana pilotalekuan. Jaialdia 10:30ean hasiko da, Promozio Sariko norgehiagokarekin. Honen ostean jokatuko dira Sari Nagusiko bi partidak. Hona hemen partiden taula:

	PROMOZIO SARIA
1	Garmendia-Semper 30	Isasmendi-Mendizabal 24
	KUTXA SARI NAGUSIA
2	Mendizabal-Arrieta 30	Housset-Serre 23
3	Etchelecu-Contin 29	Muneta-Bordagaray 30

Atsedena izango dute asteburu honetan Andueza-Ugaldek (Promozio Sarian) eta Aristorena-Ruiz de Larramendi eta Irazustabarrena-Arozena bikoteek (Kutxa Sari Nagusian).

Ongi hastea garrantzitsua da denentzat, ohartzerako amaituko baita ligaxka. Beraz, ikusiko dugu gazteenek urduritasuna nola kudeatzen duten eta ilusioa nola baliatu. Esperientzia handiagoa dutenek ere tentuz ibili beharko dute, akatsetarako ez da zirrikiturik egoten sarri eta.

Denok zaudete bertaratzera gonbidatuta.

Zorte on!

Emakumeen Gomazko Paletako Kutxa Saria 2012

emakumeapilotari — Fri, 27 Jan 2012 11:22:33 +0100

Etzi jarriko da abian goi-mailako txapelketa honen 5.edizioa. Jarraian dituzue hainbat xehetasun.

Txapelketaren ezaugarriak

- Noiztik nora: urtarrilaren 29tik martxoaren 4ra
- Mailak: Kutxa Saria Nagusia eta Promozio Saria

Bikote parte hartzaileak

Kutxa Sari Nagusia

Zortzi pilotari onenez gain lau gaztek parte hartuko dute.

A multzoa
Maider Mendizabal-Ariane Arrieta
Yanira Aristorena-Maite Ruiz de Larramendia
Maritxu Housset-Amaya Serre

B multzoa
Amaia Etchelecu-Rebeka Contin
Amaia Irazustabarrena-Nagore Arozena
Susana Muneta-Claire Bordagaray

Promozio Saria

Euskal Herrian nabarmendu diren 6 gaztek jokatuko dute.

Ainhoa Garmendia-Maider Semper
Ane Isasmendi-Maddi Mendizabal
Bea Andueza-Irati Ugalde

Lehiaketa sistemak

Sari Nagusia

- 3 bikoteko bi multzo
- Denek denen aurkako joaneko ligaxka
- Multzo bakoitzeko lehen biak finalerdietarako sailkatuko dira
- Finalerdiak: A1/B2 eta B1/A2
- Finala finalerdietako garaileek jokatuko dute

Promozio Saria

- 3 bikoteko multzo bakarra
- Denek denen aurkako joaneko ligaxka
- Multzoko lehen biak finalera sailkatuko dira

Partiden egutegia

Partidak igande goizetan jokatuko dira. Ligaxkakoak 10.30etik aurrera eta finalerdi zein finalak 11.00etan hasita.

2012ko urtarrilak 29, VILLABONA, 10:30. Ligaxkako 1.jard.

PROMOZIO SARIA
1    Garmendia-Semper / Isasmendi-Mendizabal
KUTXA SARI NAGUSIA
2    Mendizabal-Arrieta / Housset-Serre
3    Etchelecu-Contin / Muneta-Bordagaray

2012ko otsailak 12, 10:30. Ligaxkako 2.jard.

PROMOZIO SARIA
1    Andueza-Ugalde / Garmendia-Semper
KUTXA SARI NAGUSIA
2    Muneta-Bordagaray / Irazustabarrena-Arozena
3    Aristorena-Ruiz De Larramendi / Mendizabal-Arrieta

2012ko otsailak 19, 10:30. Ligaxkako 3.jard.

PROMOZIO SARIA
1    Isasmendi-Mendizabal / Andueza-Ugalde
KUTXA SARI NAGUSIA
2    Housset-Serre / Aristorena-Ruiz De Larramendi
3    Irazustabarrena-Arozena / Etchelecu-Contin

2012ko otsailak 26, 11:00. Finalerdiak
KUTXA SARI NAGUSIA
1    A1              B2
2    B1              A2

2012ko martxoak 4, TOLOSA (Beotibar), 11:00. Finalak
Promozio Sariko FINALA
1    A1              A2
Kutxa Sari Nagusiko FINALA
2    A1/B2              B1/A2

Larunbatean hasiko da Euskal Herriko Nesken Gomazko Paleta Txapelketa 2012

emakumeapilotari — Thu, 26 Jan 2012 18:07:09 +0100

Larunbatetik aurrera, hilak 28, jo eta fuego arituko dira lehian Euskal Herriko frontoi asko eta askotan txapelketa ireki honetan parte hartuko duten pilotariak. Azken urteetako joerari jarraituz, bi mailatan arituko dira. Guztira 24 bikotek hartuko dute parte. Hona hemen:

1.maila

A multzoa
Martinez-Martinez
Pradera-Saez
Manzisidor-Semper

B multzoa
Leunda-Urtasun
Irazustabarrena-Arrieta
Andueza-Aristorena

C multzoa
Garmendia-Mendizabal
Goikoetxea-Huizi
Etxarri-Mariñelarena
Martin-Isasmendi

D multzoa
Evaristti-Argain
Landaluze-Agirre
Redondo-Etxabe
Aristorena-Contin

2.maila

A multzoa
Martinez-Valcarlos
Tijero-Gutierrez
Bereinkua-Arrizabalaga

B multzoa
Santxez-Agirre
Jauregi-Lucas
Araiztegi-Lejonagoitia

C multzoa
Etxaniz-Ansotegi
Bañales-Urkizu
Txurruka-Uriarte
Lasarte-Sagastibeltza

Partidak larunbat arratsaldetan jokatuko dituzte, 16:30etik aurrera. Lehen mailakoak aste honetan Gasteizko Abetxukon eta Etxarri-Aranatzen arituko dira. Bigarrenekoak, berriz, Orion.

Xehetasun gehiagorako: Euskadiko Euskal Pilota Federakuntza

Gaur aurkeztuko da Emakumezkoen Kutxa Saria

emakumeapilotari — Thu, 26 Jan 2012 17:46:13 +0100

Gaur arratsaldean, 20:30etik aurrera, izango da Donostiako Kirol Etxean txapelketa honen 5.edizioaren aurkezpena. Jakin ahal izan dugunez aurten Saria Nagusiaz gain Promozio Saria izendaturiko bat ere jokatuko dute. Xehetasun guztiak azalduko dizkizuegu bihar bertan.