Burdinazko izaratan

Lehenengoz sartu da

bolatokira

bide zuzen hauek

zer ote dira?

Soa bidetik joan

da urrutira

zazpi panpin zuri

dauzka begira

Bolo bat hartu du

aitak laguna,

Tom y Jerry-n bonba

da ezaguna

bat-baten eztanda

egiten duna,

ba bonba horiek

bezain iluna

Zazpiak erori

dira jarraika

bonbaren indarra

handia baita.

Panpinei min egin

diezu nahita

zergatik zera hain

gaiztoa, aita?

Hilotz den panpina

ez da polita

ta malko gaziei

nekez eutsita

aita harridurak

jota utzita

denak zutitzera

joan da korrika

Lau bolo aurrean

ta hiru atzen

alferrik ari da

guztiak jartzen

erortzen dena ez

baita altxatzen

ikasi beharko du

gerra onartzen