Lehortetik ihesi

Xiringa zikinez beteta daude kale bazterrak. Bi haur dabiltza ezkutaketan. Eta zu leihotik haiei begira, zigarroak iraun artean. Neskak begiak estali ditu eta hormara begira arabieraz zenbatu du. Mutikoa korrika hasi da, oso ondo nora ez dakiela. Neskatoak amaitu du. Mutikoak ez du erabaki. Eta etxe karratuaren bueltan korrika darrai. Ez du atzera begiratzen, jende olatuaren uretan deskantsatu du azkenean. Badator neskatoa, heldu da, eta metro gutxitara daude elkarrengandik. Ozen hitz egiten duten sei bat gizon doaz pasieran. Mutikoa haien atzetik abiatu da, disimuloz. Neska autopeetan eta zabor tartean dabil begira. Mutikoa haren ondotik pasa da. Ez du ikusi. Etxe karratuari buelta bat gehiago eman dio, orain mezatara doazen gazte batzuen tartean doa, bera ere erdi oihuka. Neskatoak ez du ikusi, espaloiaren parte den odol tanta bezain arrunt egin zaio. Mutikoa, apurka, ikustezin izatera ohitu da. Neskatoa bila dabilena ez aurkitzera.

Eta geroz eta zailagoa egingo zaie elkar aurkitzea.

Guztia batazbestekotze hori,

moldeak, gure nortasun nerabeen masa amorfoa solidifikatu aurretik baldintzatzeko,

ibilera enkapsulatuak,

burmuinak arrainontzietan,

osmosiaren aurkako dogmak,,

simetria manipulatuak.

Eta hala ere, moldatu egin behar.

Zelan kabitu errealitatearen neurrietan?

Beiraz bestaldekoa lauso ikusten  baino ez digute uzten.

Dakusagunaren atzean zer dagoen ere ez dakigu. Eta bertan, gure uraren konposaera kimikoa manipulatzen dute. Ados jartzen dira, guztiak ados, erabat ados urari anestesiko apur bat eranstearekin. Biziegiak izan ez gaitezen, birak beti norantza berean eman ditzagun.

Baldintzapekoa da gure ontziaren diametroa ere.

Eta iraultza txikiena otu orduko gardentasunak salatzen gaitu.

Hanka sartzeko

Masturbazioaz mintzatzeko

Momentuak alferrik galtzeko

Lehen pertsonan jarduteko

Damutzeko

Gezurrak esateko

Isilik geratzeko

Patuari entzungor egiteko

Gu geu izateko

Adierazteko

Irrist egiteko

Txikixeagoa izateko

Biluzteko

eta biluzik geratzeko

askatasuna garesti dago.

zure eta nire desoreken arteko batazbezteko aritmetikoa

Desesperazioak baditu bi forma:

aktorearen heriotza eta espektadore inertea.

                                                                        kerobia

Malko antzeztuak bistako tragediaren adierazle izan ohi dira.

Baina inmuneegiak gara, antza (egoismoz edo superbibentziaz).

Albokoaren gainbeherak ez gaitu zipriztintzen.

Eta malko antzeztuetan ezkutatzen gara...

beste aldera begiratzen duen jende masaren tartetik hurbilduko zaigun norbaiten zain.

Distantziak

pertsonak inurri bihurtzen ditu

bonbak txanpiñoi

herriak anekdota kartografiko

estatu kolpeak ipuin

eta izenak...

izenak aduanetan geratzen dira.

Autopista bat, luzea. Eta enegarren irteeran aldapa gora bat, muino siku baterantz. Belar zapaldu asko eta zapaldubako gutxi. Etxe handi bat ezkerretara, batzuk, oso antzekoak.

Jaitxi da ibilgailutik. Ez daki ezer oraindik. Jertxea kendu du. Sargori dago. Sartu da. Entzun du. Geroz eta gutxiago hitz egin du. Orduak aurrera, gelditu da denbora. Hamabost segunduz soilik. Eta ez du garbi ikusi. Erakuts diezaioten eskatu du.

Ikusi nahi zuena ikusi du. Eta negarrez hasi da.