Ibiltarixanak

Orio-Andazarrate-Zarate-Santio-Orio

ibiltarixa — Sat, 11 Oct 2008 23:44:34 +0200

Eguraldi onak bultzatuta gustuko itzuli bat egitera atera naiz gaur mendiko bizikletaz. Aiara igoera Errotatik zehar egin dut aurtengo Euskal Herriko itzulian erljupekoan eginiko ibilbidea jarraituz. Aldapa gogorra (% 23koa une batean) da, baina igoera motzagoa egiten da. Aiatik Andazarretara errepidez joan eta han pista bat hartu dut Zarate gainera doan GRa jarraituz. Ibilbidea oso polita da eta ikuspegi ederrak ditu: alde batera Ernio eta Gazume.

Bestera Orioko hondartza eta itsasoa.

Bidean, Zarateko benta inguruan, Berrobiko Aitorrekin egin dut topo eta Oriora zijoanez elkarrekin egin dugu zati hori. Bera hortik inoiz pasa gabe zegoen eta nik ibilbidea ezagutzen nuenez, bidelagun izan dut. Andatza aldera jo dugu eta han Aginagara dijoan pista hartu dugu. Jaitsiera hasi eta laster ezkerretara dagoen langa ireki eta handik behera jo dugu. Aldapa behera, pistaz, Bidaola baserrira iritsi arte.

Hemen errepidea hasten da eta Pagoederraga baserritik Santio auzora jaitsi gara eta hemendik Oriora. Baina hor ez da bukatu gure ibilbidea. Anibarko portura jo eta Txankatik zehar Andu aldera hartu dugu eta, bidegurutzean, Itxaspe baserrira dijoan bidetik aldapan gora. Azkenik, itsasertzetik, Getariako arratoia bistan dugula, Orioko hondatzara jaitsi gara. Aitor kanpinera garaiz iritsi da, familiakoekin bazkaltzera eta ni zuzenean etxera.Guztira 40 Km. gaur ere.

Bizikletan eta piraguan

ibiltarixa — Sun, 05 Oct 2008 22:07:01 +0200

Larunbatean 9:30etan puntuan iritsi ziren Oriora Haritz eta Asier elorrixokoak. Handik lasterrera Hodei etorri zen. Gozaldu, bizikletak prestatu eta 10:30ak aldera abiatu ginen ibilbidea egitera. Hasi eta berehala bizikleta aldatu beharra izan nuen. Aurreko igandean eman nion tratuak ez zion mesederik egin eta kanbio ez dabil ondo.

Oriotik Zarauzko kanpinera igo genuen, handik beheko kanpinera Mollarriko zelaitik Talaimendi bidetik zehar, Santio bidea jarraituz. Lur-jauzi baten ondorioz bidea hondatuta dago eta oreka galdu ostean arrastada ederra hartu nuen. Errepidea gurutzatuz Astira eta Zarautz zeharkatuz Bista Alegren gora Santarba ermita ingurutik Getariako bidera. Gero Santio bidea hartu eta Askizura iritsi ginen. Askizutik Oriorako itzulera beste bide batetik egin genuen GRa jarraituz, Abeta, Garate gaina, Bista Alegre, Zarautz, Abendaño, Arizia sagardotegia zeharkatuz, Aiako bidera jo eta hemendik Iturraran, Agorregi eta Errotatik Oriora. Guztira 40 Km. inguruko ibilbide polita bezain gogorra.

Elorrixoko gazteak indartsu etorri ziren eta Hodeik eta nik nahiko lan izan genuen haien erritmoari eusten. Biok ere katarro ederra genuelako bestela hala utziko genielakoan. Oriora iristean dutxa eder bat hartu eta berehala bazkaltzera Altxerrira, galdutako indarrak berreskuratzera.

Bazkal ondoren, itsas gora zegoenez piraguan ibiltzeko aukera ez genuen alferrik galdu.

Errebantxarako aukera polita genuen Elorrixoko parea uretara botata baina azkenean barkatu egin genien eta Asierrek eta Haritzek urperatu gabe ibiltzea lortu zuten Hodei monitore zutelarik. Egun ederra eta konpletoa pasa genuen eta beste batean Bizkaia aldean errebantxa jokatzekotan gelditu ginen.

Asteburua Guikurin

ibiltarixa — Thu, 10 Apr 2008 22:54:16 +0200

Arratsaldeko bostetan bizikletak eta mendirako botak hartu ondoren abiatu ginen biok Arabarantz. Gatzagan obretan daudela eta Durango aldera hartzea erabaki genuen eta Urkiola, Otxandio, Legutio… igaro genituen.

Olleriasetik pasatzerakoan Zeramika Museoan geratzea pentsatu genuen Blankari bisitatxo bat egiteko, bide batez. Han familiarekin topatu genuen. Izan ere, buztingintzan bere maisua izan zen Jose Ortiz de Zarate lurperatu berri zuten; oraindik hunkiturik zeuden. Josetxorekin eta Blankarekin afaltzeko geratu ondoren GUIKURI ra heldu ginen.

Web orrian agertzen dena baino politagoa iruditu zitzaigun. Pilarrek eta Javierrek harrera atsegina egin ziguten.
Akostan dagoen Errekatxo tabernan, Tomasek Secretos de Carnicero atera zigun eta sekretuan gordetzeko moduko mokadu ederra jan genuen hitzaspertu luzea eginez.

Gela polit bat eman ziguten atseden hartzeko. Ederto lo egin ondoren, hurrengo goizean armosu bikaina eskaini ziguten: Jogurta, zerealak, mermeladak, laranja ura, bertan egindako ogi integrala eta pastela, tea, kafesnea…

Tripa bete eta (1) GORBEA aldera abiatu ginen.

(Argaz. Iñaki Medina)
Pare bat ordu eskas ibili ondoren eta bidean beste mendizale batzuekin topo eginez, heldu ginen gailurrera antzinan ikasitako kantu hura isilean gogoratuz …tontorrean agertzen zaigu gurutzea bere besoak zabaldurik… Haize fina zebilen eta berehala jo genuen behera.

Bigarren aldiz Errekatxora joan ginen. (2) Baba gorriak eta beharrezko diren sakramentuak zeuden menu bakar moduan. Sekulakoak!

Siestatxo bat egitea edo inguruak bisitatzea genuen aukeran eta

(3) bizikletak hartuta Muruatik irten eta Gopegi, Zaitegi, Murgia, Jugo, Oroko Amabirjinaren Santutegia, Sarria, Markina, Zarate eta Maurga ikusi ondoren, Muruara bueltan ginen berriro 37 Km eginda.

Heldu orduko prest geneukan (4)SPAra bisita: Sauna umela, Jakuzzia, sauna lehorra eta dutxa bikaina… Honekin kintatloiaren laugarren proba amaitu genuen.

Afal ondoren, Jabi, Pilar eta Gasteizko Maratoia egitera etorrita zeuden eta Guikurin ostatua hartu zuten Lluis eta Beth katalanekin tertulia luzatu genuen.

Hurrengo goizean goiz esnatu ginen, eguna aprobetxatzeko asmoz-edo.

(5) Ulibarri-Ganboako urtegia aukeratu genuen bizikletaz bira egiteko, baina Debagoieneko eta Gasteizko beste lagun mordo batek ere ideia bera izan zuen itxuraz, eta zenbait lekutan arazoak izan genituen oinezkoen artean pasatzeko.
Garaio parean errepidera irtetea erabaki eta handik egin genuen Landarainoko bidea.
Asteburua ederra izan da. Eguneroko lanari heltzeko indarberrituta etorri gara. Merezi izan du.

Morkaiko: argazki emanaldia

ibiltarixa — Thu, 10 Apr 2008 00:30:03 +0200

Morkaiko Mendizale Elkarteak antolatutako argazki emanaldia izan da gaur eta Rajalta Rajalle-ri buruzko argazkiak aurkeztu ditut. Aretoa ia beteta egonda eta gustura jardun dut Laponian egindako ibilbideari buruzko azalpenak ematen eta bertako irudiak erakusten.

Bideo batean bildu dut dena Aitorren eta Loreren laguntzari esker.
Asko poztu naiz Antton eta Txomin nire bidelagunak ere bertan izan direlako.

Eskerrak etorri zareten guztioi eta Morkaikokoei aukera hau eskaini didatelako. Ea datorren urtean norbait animatzen den ibilbide hau egitera.

Hurrengorako ze proiektu daukadan galdetu dit Piruk. Neuk ere ez dakit erantzuten baina buruan badauzkat asmoak. Udarako Transpirenaica bizikletaz egitea eta gero gerokoak. Jarraitzeko prest bazaudete kontatuko dizuet.

7. etapa: Honkamaa-Tornio

ibiltarixa — Sun, 16 Mar 2008 10:58:26 +0100

Atzokoa azkena izan zen. Hasieran 70 Km.ko ibilbidea izan behar zen, baina antolatzaileek erdira ekarri zuten azken zatian erreka bat zeharkatu behar zelako eta itxuraz ez zegoelako zeharkatzeko moduan. Hala ere,
etapa zaila eta arriskutsua izan zen elurra oso gogorra zegoelako eta ibilbidea azkarregia.

Ibilbidea arriskutsua

Irten baino lehen antolatzaileek esan ziguten, kontuz ibiltzeko eta jaitsieretan eskiak kentzeko. Kriston abaila hartzen genuen beherakoan eta ezin izaten genuen frenatu. Ondorioz, gehienetan lurrera; larruko ederrak.

Istripu larri bat izan zen: finlandiar batek mokorra hautsi zuen jaitsiera batean eta han zegoen lurrean etzanda gu pasa ginenean, hotzez dardarka, moto-kamilaren zain.

Handik aurrera mantsoago joan ginen denok lesio larririk ez izateko azken egunean.

Amaitzeko gogoa

Nik Nekane eta Rosarekin egin nuen ia ibilbide osoa. Indarrak justuak eta lehenbailehen bukatzea zen gure nahia. Azken kilometroetan Antton eta Txomin zeuden gure zain, laguntzeko. 14:00ak inguru ziren azken mugara heldu naizenean. Poza eta nekea elkarrekin nahasian.

Hotza, galanta. Dutxatzea eta arropak aldatzea nahi genuen, berotasunean sartzeko.

Tornion dena itxita

Ibilbidea amaitu ondoren autobusez eraman gintuzten Torniora, Suediako mugara. Hotelean dutxatu eta kalera joan nintzen Anttonekin eta Txominekin erosketa batzuk
egiteko intentzioarekin, baina dena itxita zegoen eta ustea ustel.

Suediako partea gertu ikusi genuen, zubiaren beste aldean, baina ez ginen haraino iritsi.

Lpin Kulta garagardo fabrika ikustera joan ginen 18:00etan eta nahikoa garagardo edateko aukera izan genuen. Handik hotelera afaltzera eta ondoren bukaerako jaialdia.

Agur festa

Antolatzaileen diskurtsoak entzun ondoren eta diplomak eta domina jaso ondoren, herrialde bakoitzeko ordezkariok, taldeka, egin genuen zerbait azken momentuan inprobisatua. Euskaldunok pare bat kanta abestu ditugu: Maritxu nora zoaz eta Aldapeko.

Espaniarrek egin zuten antzerkitxo polita, eski gainean pasatako astea parodiatuz. Azkenean, denok pozik, trago bana hartu eta ohera. Aurretik eskiak eta maletak prestatu, hurrengo egunean goiz atera behar genuelako.

Bukatu da, akabo

Konturatu gabe astea pasa zaigu. Bukatu da ibilbidea 440 Km. Finlandian barrena, zazpi egunez elurrez blai, zurian murgilduta, nire eskien hotsa izan dut une askotan bidaia lagun eta musika bakarra.

Laster etxera. Bidaia astunean izango da hausnarketa egiteko nahikoa asti.

Luze amestutako parajeetan egin dut eski gainean bidaia; baita nire barnera bidaia luze eta sakona ere. Nire mugak ezagutzeko aldarte paregabe izan da hau.
Beteta eta aldi berean liluratuta geratu naiz Laponiak duen erakartasunarengandik.

Itzuliko naiz berriro.

6. etapa: Hosi-Hokamaa (56 Km.)

ibiltarixa — Fri, 14 Mar 2008 23:12:07 +0100

Gaurkoa etapa desberdina izan da. Beti bezala goizean goiz jaiki gara, baina bestetan baino hotz handiagoa egiten zuen: -6 gradu. Zein argizari jarri izaten da halakoetan kontua. Niretzat hori ez da problema, lagun onak ditut-eta. Anttonek erabaki du urdina jartzea eta harekin atera gara.

Uste baino azkarrago

Hasi eta berehala konturatu gara eskiak oso azkar zebiltzala. Aurreko egunetako elur bustia izoztu denean gogor jarri da ibilbidea eta arrastoek kristalezkoak ziruditen. Kriston abaila hartu eta gutxien uste genuenean... lurrera. Golpe edarrak hartu ditut, hiruzpalau narruko, baina uste baino askoz azkarrago iritsi gara bukaerara. Eskien gainean zazpi ordu inguru egitea zen gaurko asmoa eta bost ordu eta erdian egin dut ibilbidea.

Denok oso azkar joan gara, baita ni neu ere. Pentsa, orduan, nola joan diren aurrenekoak. Gure taldeko Mikel, Mariano, Isabel, Antton, Txomin, Pako hirukotea... eta beste guztiak ziztu bizian.

Elurretan gure isla

Eguraldia izan da gaurko nobedadea. Eguerdi aldera eguzkia atera da eta egun polita egin du nahiz eta aurpegian hotza nabaritu. Gure itzala elurretan eskiatzen ikustea izan da arraroena; bitxia benetan.

Etapa bukatu den lekuan gelditu dira eskiatzaile erdiak eta beste erdiak, gu tarteko, handik 50 Km. ingurura eraman gaituzte autobusean. Egurrezko etxetxo polit batzuetan gaude izoztutako aintzira baten ondoan.

Saunatik ur hotzetara

Iritsi eta berehala saunara joan gara eta handik irtendakoan lakuko putzu batera ur hotzetan bainatzera. Gure zintzilikarioak txikiak baziren lehen pentsa nola gelditu diren irten garenean. Gero berriz saunara eta dutxaren ondoren afaltzera. Egunero bezala, kriston afaria: entsalada bariatua, pasta, arroza, oreina saltsan... eta bukatzeko, kafea edo tea.

Afaria bezala hau ere bukatzera doa. Bihar azken etapa 72 Km.koa. Tornion bukatuko dugu, Suediako mugan. Orain bilera daukagu biharko kontuetaz hitz egiteko eta badirudi etapa laburragoa izango dela azken zatian elurrik ez dagoelako ibilbidean. Laster jakingo dugu hori.

Azkena bihar eta festa

Bihar bukatuko da bai, eta ez nolanahi gainera. Amaierako jaialdia izango dugu. Nonbait urtero, bukaeran parte hartzaileek, herrialdeka, ikuskizunen bat egiten dute bukaerako jaialdian. Euskaldunok ez dugu ezer prestatu, baina uste dut abestu egingo ditugula euskal kantaren batzuk. Espero dut ni baino kantari hobeak izaten taldean. Horretan ere, eskiatzen bezala, ni baino hobeak nonahi.

Baina dena amaituta juerga eta jai girorako denak onak. Hortaz, biharko kronika berandu iritsiko da beharbada. Ea bueltan abiatu aurretik kontakizuna egiten dizuedan.

Ondoloin eta laster arte.

5. etapa: Ranua – Hosio (47km.)

ibiltarixa — Thu, 13 Mar 2008 22:20:26 +0100

Atzoko etapa oso-oso luzearen ostean, gaurkoa motzagoa izan da. Dena dala, bileran esaten digutenetik beti egiten dugu kilometroren bat edo beste gehiago. Gaurko ere 46 esan eta 47 gutxienez bai.

Paisaje monotonoa

Temperatura 0 gradutik gora eta elurra bigun xamarra. Ibilbidea, berriz, gorabehera handirik gabea. Paisajea ere monotonoa oso. Pinu artean egiten dugu bidea askotan eta pinuak alboetara uzten ditugunean sekulako lautadak aurkitzen ditugu. Gaur pasa garen parajeetan bart otsoek zortzi orein hil omen dituzte, guk hanka hezurrak baino ez ditugu ikusi. Otsoen uluak entzun ere ez. Egunotan zerua ilun eta behelainoa lagun.

Gaurkoan nobedadea txitxiburduntzia. Bai, jateko postu batera ailegatu garenean sutan erretako saltxitxak eman dizkigute. Makilan sartu, sutan erre eta guk barrura. Gainontzean betikoa: pasak, txokolatea, mehu.

Azken abituallamentua Ruonako eskolan ipini dute. Polita izan da egin diguten harrera. Ume txiki batzuek eurek egindako zintzilikario bana eman digute. Ohitura omen da trabesia honetan.

Esan bezala, motzagoa izan da gaurko etapa. Atzo ilunetan iritsi nintzen, ozta-ozta aurkitu nuen hotela.

Gaur badirudi argitzen ari dela zerua, ilargia ere ikusi dugu, hortaz, bihar seguru aski eguzkitsu izango dugu. Eguzkiarekin batera, ordea, hotza. -6 graduko tenperatura espero dugu eta elurra, noski, gogorragoa.

Gaurko hotela, eskola

Garai batean eskola izandakoan hartu dugu ostatu 30 lagunek; beste talde bat urrutiago eraman dute lotara. Bihar guri tokatuko zaigu helmugara iritsitakoan lotarako tokira joateko urrutiratu beharra.

Garaiz iritsi garela eta atseden hartzera joan naiz eta jaiki naizenerako besteak afalduta; hemen argi ibili ezean… Ni ere gaur 18:30erako afaldua nintzen. Jatekoarekin ezin gara kexa. Biharko esan digute ez dela solidorik izango eta bapo gosaltzeko. Denetarik izaten da gosaritan: enbutidoa, gazta, tortilla, hirugiharrea, saltxitxak, jogurta, zerealak, tea, kafea… nahi beste aukeran.

Jatekoa ez da arazo, gehienon problema oinak dira. Minduta dauzkagu askok. Nik neuk beltz-beltz dauzkat bi behatz, baina ez dira konjelazioak, lasai. Bihar Anttonek utzitako botekin joango naiz. Handiagoak dira eta mejora sumatuko dudala uste dut.

Hauetako egun batean postu batera iritsita norbaitek eski batekin arazoren bat zeukala eta konpontzeko eskatu genuen. Hara non atera zuten sekulako labana. Badaezpada ez diegu esango behatzak nola dauzkagun…. batere gabe bueltatzeko arriskua izango dugu bestela.

Biharko gutxi gorabehera 60 Km.ko etapa. Esan dizuet eguraldi eguzkitsuagoa baina hotzagoa espero dugula. Hemen gabiltza zer jantzi, zein eski eraman ez dago hizketarako apenas beste gairik. Baina bihar biharkoa.

Gero eta gutxiago falta da eta pixkanaka, egunean egunekoa eginez ari gara helmugara gerturatzen. Guk egunero etapa amaierara iristeko nahikoa lan eta hemen badira adinean gora doazen gizon eta emakumeak, 70 urteren bueltakoak, Osintxuko txakurrarena egiten digutenak: harrapau eta pasau.

Hiru B

Abiaduran arinago omen dabiltza haiek baina eski lagunek hala esaten didate: Alberto, zuk hartu gogoan hiru B-ak: Baloria, Barrabilak eta Belozidadia, azken hau neria, noski.

Bihar eguzkitsu argituko omen du egunak, ordura arte agur eta ondoloin, lagunak.

4.etapa: Syötekeskus-Ranua (84 km, 90km benetakoak)

ibiltarixa — Wed, 12 Mar 2008 22:02:43 +0100

Zorioneko etapa luzea bukatu dugu eta hemen nago, Txominekin eta Anttonekin kronika idazten afaldu eta gero garagardo bana eskuan dugula.

Etapa oso luzea izan da, bere luzean gogorra oso.

Eguna argitu aurretik

Goizean goiz, 06:30ean hoteletik behera jaitsi eta 6:45ean hasi gara eskiatzen, ia eguna argitu gabe zen oraindik.

Hasi eta 5. km. ingurura iritsita, aurrean zihoazenek erreka batekin egin dute topo eta pasatzeko uretara sartu beharra zegoen elurra urtu egin delako. Ausartenak botak kendu eta pasatu egin dira; gehienok buelta eman eta kilometro gehiago egin ditugu zubitik pasatzeko.

Jan eta edan

Anua postu dezente zegoen bidean eta denak beharrezkoak izan zaizkigu. Gehienetan mehu (hemengo edari tipikoa, aranen edo grosella modukoen
zukua) ematen digute; baita ere mahaspasak eta txokolatea.

Ibilaldiaren erdi inguruan tipi batean zopa beroa, mehu eta kafea edo tea. Gaurko zopa ere oso ona zegoen, berotu beharra geneukan eta ederki sartu zaigu. Hau 44. Km.an izan da.

Handik bukaerara arte beste 40 km. Luze egin zait bidea, baina bazkal ondoren pentsatu dut lortuko nuela.

Bakardadea, isiltasuna

Denbora guztian erritmoa markatu diot nire buruari. Atzoko taldetik apur bat atzerago joan arren anua-postuetan elkartu gara. Azken 5 km.ak oso luzeak
egin zaizkigu eta aintzira handi bat zeharkatu dugu Ranua herrira iristeko.

Ez dugu etxe bat bera ere ikusi 90 km.an. Bakardadea, isiltasuna, pinuak eta dena elurtuta.

Azkenean denok oso pozik, baina baita oso nekatuta ere
Gorputza txikituta daukat, baina biharko berriz martxan
izango dut.

Gaur sauna, dutxa eta afari edarra bilera aurretik.

Bihar biharkua

Biharko etapa ez da oso zaila, laburragoa behintzat bai: 44 km. Ea arratsaldean, iritsitakoan denbora pixka bat hartzen dugun herria ikusteko.

Nekatuta nago eta ohera noa. Bihar 07:00etan diana, gure eguneroko sokamuturrari ekiteko. Zezenik ez, baina zuen animoak akuilu helmugara iritsi arte.

Bihar arte, ondoloin.

3. etapa: Taivalkoski - Syötekeskus (Kyula): 59 Km.

ibiltarixa — Tue, 11 Mar 2008 22:38:13 +0100

Etapa lasaiagoa zirudien baina ez da horrela gertatu. Gauean eta goizean euria egin duenez, elurra bustia zegoen eta horrela polikiago ibiltzen ziren eskiak.

Zortzikotea

Ibilbide hasiera Raulekin eta Andonirekin egin dut, baina 29. Km.tik aurrera zortziko talde bat osatu dugu Jose Luis, Nekane, Rosa, Fran (katalana) eta Mertxerekin. Oso gustura egin dugu azken partea, kantari ere jardun dugu, nahiz eta bukaeran nekea sumatu. Taldean nekea gutxiago sentitzen da eta horrela izan da.

Aldapa dezente izan ditugu, batez ere azken aurrekoa eta azkena. Aldapa luzea izan da azken aurrekoa eta hori gutxi balitz, azkenean eski estazio batean bukatu dugu, 2 Km.ko igoera egin ondoren. Bukaeran arrastre bat hartu dugu hotelera iristeko eta menditxo batean gaude hotel ederrean.

Etapak 54 Km. zituela esan ziguten baina azkenean 59 Km. izan dira.

Masajea

Etapa bukaeran ahal dena. Batzuek saunara, beste batzuek biharkoak prestatzen... nahikoa lan. 16:30ak jota iritsi gara eta nik masaje bat hartzeko izena emana nuen, 16:30erako. Zuzenean joan naiz izerdiz blai eginda eta 16:40ak zirenez esan dit kentzeko arropak eta han jarri naiz biluzik eta kriston masajea eman dit hanketan. Han bakarrik nire hanka pelotak txikituta zeuden eta.

Kontuz! Bihar 84 Km.

Afaria goiz izaten da eta berehala joan beharra dago. Arratsaldeko 18:30ean afaltzen ginen denok. Gero, 20:00etan bilera izan dugu parte hartzaile guztiok, egunero bezala, biharko etapari buruzko xehetasunak jakiteko. Hemen aurpegi serioak denok. Biharko etapa oso luzea da (84 Km.) eta esan digute 11-12 ordu beharko ditugula osorik egiteko, eta ahal dela osorik iristeko. Irteera ordua aurreratu egin dute, 18:30era eta hala eta guztiz ere gu iritsi orduko izango dira 19:00ak. Ordu horretan hemen iluna da eta frontalak eraman behar ditugu.

Umorea ez dugu galdu baina kezkatuta gaude eta batzuk urduri ere bai eskiei zelako argizaria eman asmatu ezinik. Ni ere bihar eskamadun eskiak utzi eta argizaria dutenekin aterako naiz, azkarragoak direlako eta 20:00etan ez iristeko, badaezpada.

Orain gehienak ohean daude eta ni ere banoa lehenbailehen.

Bihar, ahal badut, kontatuko dizuet nola joan den.

Eskerrak nire amak esan zidan errezatuko zuela nire alde egunero.

Ondo izan.

2. etapa: Kuusamo-Taivalkoski: 65 Km

ibiltarixa — Mon, 10 Mar 2008 22:06:37 +0100

Gaur ere goiz jaiki gara: 06:00etan. Gosaria 06:30ean eta gero autobusa hartuta irteera puntura joan gara.

08:00etan hasi gara martxan.

Eguraldia lainotua baina epela: -1/-2 gradu. Bidean elur pixka bat egin digu. Gauean elurra egin du eta ibilbidea atzokoa baino astunagoa zegoen. Atzo Camel back-ean neraman ura izoztu egin zitzaidan, gaur gabe joan naiz.

Bazkaria

Lehen partean denok ondo ibili gara eta gainera anua postu asko zeuden. Hauetan edari epel gorrixka bat ematen digute, basoko fruitu gorriz egina dirudi, ahabiz-edo; gozoa da baina ez da patxarana. Bazkaria Tipi (kanpin denda itxurako hemengo txabola, Laponiako nomaden bizilekua) batean eman digute: Izokin zopa beroa eman digute eta mundiala zegoen.

29. kilometroa zen. Ibilbidea oso polita izan da baina nahiko monotonoa, ez dugu bidean etxe bat bera ere ikusi. Dena basoa, sekulako zuzengune luzeak zeuden.

Eskamadun eskiak

Handik aurrera nahiko gaizki ibili dira gehienak eskiekin. Argizaria emanda zeukaten eskiek ez zuten heltzen eta nahiko komeria izan dute. Ni, berriz, eskamadun eskiekin atera naiz eta pixka bat motelagoak izan arren ondo ibili naiz. Nahigabe asmatu egin dugu pare bat lagunek eskiak aukeratzerakoan.

Gaurko ibilbidea nahiko laua izan da, amaierako partea izan ezik. Azkena aldapatsua eta jaitsierak ere gogorrak zeuzkan; ziztu bizian jaitsi eta gero berriz kriston aldapa. Andoni eta Isabel izan ditut lagun tarte horretan.

Sauna eta pizina

Atzoko aldean askoz hobeto iritsi naiz: 15:30ean amaieran nengoen. Atzetik jende dexente zetorren, hortaz, denbora gehiago izan dugu saunarako. Gaur, gainera, ur epeleko pizina eta txorroak geneuzkan hotelean eta asko disfrutatu dut. Nekea kentzeko onena. Gu uretan eta kristaletatik bi metrorainoko elurra ikusten genuen pilatuta.

Arratsaldeko 17:30ean (horko 16:30ak) afaltzera; buffeta. Nahi beste aukeran.

Afaldu eta 20:00etan bilera biharko xehetasunak
jakiteko: ibilbidea, tenperatura, eguraldia. Biharko iragarpenen arabera eguraldi lainotua eta epela (+2 gradu) izango dugu.

Biharko etapak 56Km. ditu. Baina etzikoaren beldur gara 84 Km.koa da eta.

Ea zer moduz ateratzen zaigun biharkoa. Hemen, egunean-egunean ibili beharra dago, harrokeriarik gabe.

Ondo izan eta bihar arte.