Orio-Zumaia mendi bizikletaz

---

 

Abenduaren 24an, Oriotik Zumaiara joan gara, Santi koinatua eta biok, mendiko bizikletaz, Santio bidea jarraituz, Askizutik zehar. Oriotik Zarauzko kanpinera igo dugu Txurrukatik zehar. Kanpina gainditu ondoren Mollarri (Malla harri) aldera jeitsi gara.

De Orio-Zumaia

Itsas gaineko ikuspegia ederra da Getariako arratoia aurrez-aurre dugularik. Hemendik Talaimendi bidea jarraituz beheko kanpinera jeitsi gara, gero Azti aldera jo eta Zarautz zeharkatzeko. Azpeitiko bidea jarraituz, Bista Alegre auzoa pasa ondoren eskubira hartu dugu aldapa gogorrak gaindituz, Santa Barbara auzorantz. Hemendik aurrera Santioko bidea jarraitu dugu Getariako Askizu auzotik zehar. Zumaiarainoko bidea jeitsi ondoren herrira jo dugu bidegorritik zehar eta Amaia Plazatik itsas aldera Ardantzabide auzoko bidea jarraituz. Algorriko hondartza gainean gaudenean itsasoaren ikuspegia zoragarria da flysch-ak begien aurrean ditugula. Itsasoa gure oinetan dugula dirudi. San Telmoko ermitatik zehar Itzurungo hondartzara jo dugu.

Argazki batzuk atera ondoren itzulerako bideari ekin diogu. Santiagoko hondartzan zehar ibili gara eta, Zuloaga museoa gainditu ondoren, aurrez jeitsi dugun aldapa gogorra igo behar izan dugu Askizu aldera.

Getaria pasa eta Zarautzerantz egin dugu mahastietatik zehar, alderantziz jarraituz. Ibilbidea polita da eta bertako ikuspegia zoragarria da. Kanpinetik zehar Oriora itzuli gara eta jatetxeak itxita aurkitu ditugunez etxera joan eta zerbait prestatu ondoren, hotzik egiten ez duenez, terrazan jan dugu biok.