Josu Leokanne (blog zaharra)

Asto batetik asto azkar bat lortu daiteke, baina sekula lasterketarako zaldia. Astoa akuilatu dezakegu eta, hala-nola, hasiko da ahal duen moduan korrika. Agian itxura emango du, baina konturatuko gara ez dela zaldia, astoa dela.

Gure herrian, gauza asko egiten dugu asto moduan. Herriko arkitektura astotsutik hasi, Txontako astakeria urbanistikotik segi, eta detaileak noiz zaintzen ditugun ikusteak borobiltzen du astotasun guztia. Kaleko gabonetako kartel zintzilikariak astelehenean kendu zituzten. Gure kaleotan hain txarto zeuden zuloak ere azken hiru asteotan konpondu dituzte. Hauteskundeak pare bat hilabete barru datozkigu, eta giroan nabaritzen da. Zenbat albiste proiektu berriz, orain arteko proiektuen onuraz, gastatu duten denon diruaz harro? Nabaritzen da, bai, hauteskundeak gainean dauzkagula. Uxala urtero izango bagenitu!

Tira, beste erakundeek ez dakit, baina Udalak behintzat erakutsi digu ez duela dena elektoralismoz egiten. Azken asteotan gure astobideei kaña ematen ari dira. Konpondutako kaleak, gabonetako kartelak kentzea... kasualitate hutsez bada ere, Etxebizitza Ministraren bisitaren astean amaitu dituzte. Elektoralitis ala ministritis? Ongietorri biei!!