Baga, biga, bloga!

     Gaurkoan Baga, biga, bloga!-n autolaguntza pixka bat: Aholkuak, tokatu zaizkigun garai nahasi hauetan bizirik irauteko lagungarri izan nahi dutenak.

Brad Pitt-en Araua.

     Brad Pitt-en Araua honela labur genezake:

     Proposatu iezaiozu gustuko duzun emakumeari zurekin joan dadin afaltzera, zinera... hitz batez eskaiozu zita bat. Baietz esan dizu? Ondo, beharbada bere gustukoa zara. Baina, aitzakia bat jartzen badu zurekin ez joateko, zer?  Brad Pitt-en Araua aplikatzeko momentua heldu da.

     Suposa dezagun zure ordez Brad Pitt-ek eskatu diola zita. Aitzakia berbera jarriko luke berarekin ez irteteko? Brad Pitt-ek irteteko esan izan balio erantzungo zion ikasi behar duela edo lagunekin plana duela edo...? EZ. Plan guztiak atzeratu edo bertan behera utziko zituen Brad Pitt-ekin joan ahal izateko.

     Baina –ai!- zu ez zara Brad Pitt. Emakume bat zurekin benetan interesatuta balego, dituen plan guztiak utziko lituzke zurekin egoteko. Salbuespenak egon litezke, jakina. Baliteke benetan ezin izatea egun zehatz batean baina, kasu horretan, proposatuko luke berak beste egun bat. Esaterako, esango luke: “Zapatu honetan ezinezkoa zait. Eta hurrengorako geratzen bagara?”

     Ez irteteko aitzakia jartzen badu eta ez badizu ordezko planik eskaintzen, ez duzu berarentzat interesik, alferrik ari zara eta ez duzu ezer lortuko.

     Edo bai; badakizu: Ezina ekinez egina.

Handik eta hemendik.