Baga, biga, bloga!

Denboraren ahoak (IV): Jende bitxia

Jozulin — Sun, 14 Mar 2010 19:37:44 +0100

Soledad, bost urte, Juanita Fernandezen alaba:
-Zergatik txakurrek ez dute postrerik jaten?

Vera, sei urte, Elsa Villagraren alaba:
-Non egiten du lo gauak, hemen, nire ohe azpian?

Luís, zazpi urte, Francisca Bermúdezen semea:
-Haserretuko da Jainkoa berarengan sinisten ez badut? Ez dakit nola esango ote diodan...

Marcos, bederatzi urte, Silvia Awaden semea:
-Jainkoak bere burua egin bazuen, nola moldatu zen bere sorbalda egiteko, ikusten ez bazuen?

Carlitos, berrogei urte, María Scaglioneren semea:
-Amatxu, zenbat urterekin kendu zenidan titia? Izan ere nire psikologoak jakin nahi du...

Denboraren ahoak Eduardo Galeanoren testuak dira, Bocas del tiempo liburutik hartu eta ahal bezala itzuli ditudanak.

Herri arraro hau

Jozulin — Thu, 11 Mar 2010 21:32:56 +0100

Ez al da apur bat WTF!? Bilboko Elkarren dendan ez edukitzea oraindik Imanol Muruaren liburua?
Lagundu, mesedez:

Get your own Poll!

Euskaltzaindiaren araua

Jozulin — Sun, 07 Mar 2010 19:07:03 +0100

Euskaltzaindiaren arau berria. Egin klik argazkian edo hementxe bertan irakurri ahal izateko.

Argazkiak.org | batetan2 © cc-by-sa: Jozulin

Izarren hautsa, hitzez hitz

Jozulin — Mon, 01 Mar 2010 21:08:54 +0100

Hala da, bai: zeure gorputza osatzen duen atomo bakoitza izar baten eztandaren ondoren -supernoba baten ondoren- da sortua. Are gehiago, seguru aski zure ezker eskuko atomoak eta eskuinekoak, esaterako, izar desberdinetan sortu ziren. Pentsa dezakezu -eta egia litzateke- zu zeu jaio zintezen izar bat hil zela.

Nork esan du zientzian ez dagoela poesiarik?

Let´s dance Keriko dance!

Jozulin — Thu, 18 Feb 2010 18:34:36 +0100

Ladies and gentlemen:

Let´s dance the stunning, astounding, impressing and... so embarrassing, indeed:

Keriko dance!

euskaltube.com audioak | Izenburua: Let s dance Keriko dance! | Erabiltzailea: jozulin

Entzun duzuen minutu bat eta segundu bateko tontakeria bideo hau ikusitakoan otu zitzaidan. Zer nahi duzue, ez daukat ganorarik bapez!

Pentsatzen jarrita...( XI ): Ukendua ukondoan edo Adinarekin pitzatzen gara

Jozulin — Wed, 10 Feb 2010 13:21:44 +0100

Pentsatzen jarrita... adinean aurrera joatea erabili behar dugun ukendu kopuruaren arabera neur daiteke. Behin berrogeiak aspaldi atzean utzita, izugarri hazten da gorputzean sakabanatu beharreko krema multzoa: ukondoetako erroitzetarako baltsamoa, eskuetako arrakaletarako ukendu norvegiarra, buruko soilgunea babesteko gantzua... Eta gaitzerdi, ez badugu erabili behar ixilean sufritzeari uzteko beste hura.
Adinarekin pitzatu egiten garela, alegia. Eta zentzu baten baino gehiagotan, gainera.

To, asteazken ganorabakoa!

Pentsatzen jarrita...(X): autof(r)ikzioa

Jozulin — Sun, 07 Feb 2010 13:43:38 +0100

Aspaldian aipatu genuen zientzia f(r)ikzioa eta literatura erotikoaren arteko harreman estua. Eta, pentsatzen jarrita, oraintsu oso boladan dagoen autof(r)ikzioa ere kokatu beharko genuke literatura erotikoa atalean. Ageriko arrazoiengatik.

Denboraren ahoak (III): Hitz itsusiak

Jozulin — Sat, 30 Jan 2010 22:09:11 +0100

Ximena Dahm artegatuta zebilen goiz hartan; ez zen gutxiagorako, egun hartan hasiko baitzen eskolan lehenbizi. Arineketan zihoan ispilu batetik bestera etxe guztitik. Halako joan-etorri urduri batean zoruan zegoen poltsa batekin estropozo egin eta luze erori zen lurrera. Ez zuen negar egin, bai haserretu:
-Zer egiten du kakazahar honek hemen!?
Amak arteztu nahi izan zuen alaba:
-Laztana, hori ez da esaten.
Eta Ximenak, lurretik, jakin nahi izan zuen:
-Ama, eta zertarako daude, ba, esaten ez diren hitzak?

Denboraren ahoak Eduardo Galeanoren testuak dira, Bocas del tiempo liburutik hartu eta ahal bezala itzuli ditudanak.

Hardcore porn

Jozulin — Sat, 23 Jan 2010 19:04:41 +0100

Andrea eta gizona pantailan, porno heteroa beraz. Telebista soinurik gabe daukat pornografia ikusteko ez baita beharrezkoa entzutea gaiaz jabetzeko.

Berriak irakurtzen hasi dira, irudiak lagun: Ertzainak itzuli dira Haititik eta Rodolfo Aresek egiten die ongietorria kameren aurrean, aireportuan bertan. Argazkia ateratzen dute. Txakurrak argazkian. Hondakinetan bila ari izan direnetako txakur batek korrika egin nahi du aurrerantz baina gogor teinkatzen du uhala polizia batek: -Geldi hor! Argazkian atera behar dugu eta! esan nahi lioke. Prentsaurrekoan polizia bat negarrez hasi da igarotakoa gogoratzean, kamerak berari begira. Hunkigarria.

Berri gehiago: Soldadu espainiarren irudiak orain, bandera hori-gorri erraldoiaren itzalpean soldaduak ura eta janari paketeak diruditenak banatzen ari dira. Haur beltzek irribarretsu, urduri eta kamerari begira hartzen dituzte.

Irudi gehiago: Hegazkin sabel lodiek zerutik askatzen dituzten kutxak jauzkailuz heltzen dira lurrera. Armada ezezagun bateko soldadu gehiago ari dira zerutiko opariak banatzen. Armen mehatxupean lortzen dute soldadu zuriek pobre beltzak iladatan jartzea elikagaiak hartzeko. Kamerak han dira, begira.

Telebistan ikusten ari naizen exhibizio inpudiko honen guztiaren aurrean indargabe sentitzen naiz. -Zelan engainatzen gaituzten! otu zait, antzu.

Hardcore porn, pentsatu dut, porno gogorra. Eta ohartu naiz hard core bihotz gogorra lez itzul litekeela.

Eguneraketa: Porno gehiago. Lehen bi minutuak entzutearekin nahikoa.

Ni kaikua nintzen, ipurditik gora eta ipurditik behera

Jozulin — Mon, 18 Jan 2010 12:57:09 +0100

Orain hilda nago baina lehen kaiku hutsa nintzen. Ez kaikua bakarrik:

pelloa, inozoa, kirtena, tetelea, papaoa, kelona, babalorea, alua, lerdoa, tentela, eltzagorra, memeloa, leloa, tontoa, babaztoa, babalastoa, pepelerdoa, tuntuna, astakirtena, totoloa, baboa, artaburua, tontolapikoa, kaiku alena, arina, astapitoa, buruarina, eltzea, eroa, eroxka, kaskarina, memoa, mentsa, txatxua, txoriburua, tonta, mamala, txoropitoa, zoroxka, zozoa, zozoiloa, tontoloa, bulunba, xanfarina, zuntzuna, zoroa, gangarra, ganorabakoa, ganoragabekoa, kokoloa, lapikoa, mozoloa, taketa, tankaloa, txotxoloa, pettuxa, ganbelua, inputika, narra, txolina, zorokoa, kokoa, txotxina, haizebelatsa... ere bai.