Baga, biga, bloga!

Enpin, hona hemen nitaz jakin beharko ez zenituzketen bost gauza baina, tira, hala ere kontatuko dizkizuedanak, Jonasen gonbitari jarraituz:

• Egun batean Espainiako Felipe printzea agurtu nuen eta berak ere agurtu ninduen ni, irribarretsu. Berak neska ilehori eder bat zeukan alboan, lotsatuta alde egin zuena. Ni bilutsik nengoen; larru gorritan, alegia. Hitzez hitz.


• Selektibitate azterketaren lehen egunean Zazpi Kaleetan sekulako aitzurra harrapatuta, Seat 850 zahar batean itzuli
  ginen 8 (zortzi) ganorabako. Policía Nacional-aren kontrola pasatu genuen zortziotako batek beso bi eta pandero bat (bai, pandero bat) leihatilatik kanpora zeramatzala. Zortzietako bat goi karguen bizkartzaina da egun; zortziotako beste bat The Organizationeko number one izendatu dute sarri.
  Selektibitatea penkatu nuen, jakina.


• Euskaltegiko lehen urteetan, negu minean, klaseak hasi baino lehen, sotora jaitsi behar izaten nuen, kaldera han baitzegoen; orduan, egurra txikitu, egunkari zaharrekin bolak egin eta sua piztu. Gero, klasean nengoela, irten behar izaten nuen tarteka ikatza botatzera. “Los felices ochenta” ziren.
  


• Nire lehen ordenagailua (lanekoa) hauxe izan zen.
  Halako trasteak zertarako balio zezakeen ideiarik gabe saltseatzen hasi, eta orduz gero urteetan noizean behin agertzen zen ikonoa aterarazi nion. Bere bizitzako azken urteetan beltz geratzen zitzaion pantaila tarteka. Halakoetan nahikoa izaten zen gainean ukabilkada indartsu bat arazoa konpontzeko.


• Bolada batez Mercabilbaon egin nuen lan oilaskoak eta txerrikia saltzen zituen postu batean, goizaldeko lauetatik goizeko hamar eta erdiak arte. Nire zereginetako bat oilaskoak zatikatzea zen: ezkerretara neukan oilasko kaxa dorre bat, ni baino altuagoa, eta aurrean taukia eta matxetea. Oilaskoa tauki gainera bota, matxeteaz hankak, sama eta burua moztu eta kaxatan banandu; beste oilasko bat tauki gainera bota, matxeteaz hankak, sama eta burua moztu eta kaxatan banandu...

Eta, bueno, kate memelo hau jarraitzearren honakoei pasatuko diet lekukoa (besteren batek ez badie oraindik pasatu):

Trikua, Nahikari, Ricardo, Gumersindo eta... ohorezko eta aspaldiko erantzule bati, zergatik ez: Satortzulo Jaun / Andereari, berak gustua badu.

Baina libre zarete: katea jarraitu nahi ez baduzue, ulertuko nuke, neu ere zorian egon naiz eta.