LUTZ LONG jauzilariaren toalla

Sexuen arteko berdintasuna bilatzen duten ekimen batzuk hain justu kontrakoa lortzen dute. Hori dio, behintzat, gure kuadrillako ideologo teorikoak. Gabonetan opariak banatzen ibiltzen den Mari Domingiren azken urteotako asmakizuna jarri du adibide. Bere ustez, emakumeen figura prestigiatzeko sortu den pertsonaia hori, praktikan, Olentzeroren laguntzaile huts gisa ageri da, hau da, emakumearen bigarren mailako papera finkatzen du: Olentzero da garrantzitsua, eta Mari Domingi alboan du besterik gabe, edo Olentzero ezin joan den lekuetan agertzen da. Azken batean, 24ko gauean beti Olentzero etortzen baita etxeetara, ez besterik. Mari Domingi, sra. de Olentzero.

Eta horixe gertatzen omen da pertsonaia maskulino baten eragina orekatzeko intentzioz asmatu diren pertsonaia femenino sekundario guztiekin. Emakumea sustatzeko, emakumeak berak izan behar du protagonismoa.

Horren aurrean, gure kuadrillako deabruaren abokatuak defendatzen du ea zergatik diren beti emakumezkoak pertsonaia maskulino nagusi horien lagun bezala sortzen diren bigarren mailako pertsonaia horiek. Ea benetako berdintasuna sustatzea ote den gizonezko pertsonaia bati asmatzen zaion laguna beti emakumezkoa izatea.

Eta ea zergatik doan Mari Domingi Olentzero baino 3-4 mende lehenagoko arropekin jantzita.

Beste baterako utziko dugu gure kuadrillako filologo amateurrak sutsuki defendatzen duena: kantan ageri den Mari Domingi hori benetan gizonezkoa dela, Hor konpon, Mari Anton esapidean dagoena ere gizonezkoa omen den bezala. (??)

Orain ulertuko duzue zergatik diren gure kuadrillako poteoak horren latzak.