Ibilbidea: Berako Institututik abiatuko gara eta Malet-etik barna Larun igoko dugu.

Zailtasuna: erdikoa-edo

Denbora: 5 ordu (Beratik Berakoa)

Iruñatik Berara iritsitakoan, bertako Institutuko aparkalekuan autoak utziko ditugu eta Maletetik barna Larun gailurrera igoko gara.

Larun mendia Lapurdi eta Nafarroa Garaia artean dago. Bidasoa eta Ugarana ibaien artean dago eta 900 metroko altitudea du.

BITXIKERIAK

Montijo-ko Eugenia, Napoleon III.aren emaztea, Miarritzeko giroan aspertu egiten omen zen, kokoteraino zegoen printze eta bestelako pertsonaien festetaz. 1859ko irailaren 30ean, bere gortea bildu eta Larruneko gailurrera ibilaldi bat antolatu zuen. Batek baino gehiagok beren gona zatiak utzi zituzten sastraketan trabatuta... Eugenia liluratuta gelditu omen zen mendiari itsasten zitzaizkion lainoei begira. Nanou Saint Lèbe-k "Viajeras por los Pirineos" liburuan kontatzen duenez, enperatriza eta bere segizioak Hiru Iturrietako lepoan geldiunea egin zuten bazkaltzeko. Gero, oinez egin zuten gailurreraino heltzeko falta zitzaien tarte maldatsua, eta goian, meza izan zen. Azkenik, bertan bildu zen nonzeberri ikusle andanak lagunduta, gorte inperiala Azkaine aldera jaitsi zen. Eugenia gona beltz motz batekin eta franelazko alkandora gorri batekin jantzita igo omen zen Larrunera; eta buruan kapela bat zeraman. Horrela jantzita dantzatu omen zuen fandangoa Hiru Iturrietako lepoko belazean, Berako dantzari eta musikariek lagunduta.

Montijo-ko Eugeniak ospea eman zion Miarritze herriari, horrela hartu zuen orain arte gorde duen itxura turistiko-aristokratikoa. Frantziako enperatriza hain gustura egoten omen zen Miarritzen, udak pasatzeko etxe bat eraikitzea bururatu zitzaiola. Honela eraiki zen "Villa Eugénie" Miarritzeko itsasertzean, eta han hartzen zituzten politiko, ministro edo erregeak. Miarritze printze, printzesa, erregin eta antzeko pertsonaietara ohitu zen honela, uda pasatzeko modako lekua bihurtu baitzen. Ingalaterrako Eduardo VII.a erregeak eta Victoria erreginak denboraldi luzeak igaro zituzten hemen. Itsasoan bainuak hartzea modan jartzen hasi zen, kanpotarrak herri hau bisitatzen hasi ziren, eta lehen arrantzale portu txiki bat zena, turismorako gune garrantzitsua izatera iritsi zen.

Laruneko gaina, bi une desberdinetan:

Argazkia: Luix Unanue

Gurekin ibiltzeko gogorik baduzu baina txango honetara etortzerik ez badaukazu, lasai! Beste aukera asko izanen dituzu, gure urte osorako egutegia begiratzea besterik ez duzu.

Aralar mendizerrak 208 km² ditu. Lurraren herena Gipuzkoan  eta beste bi herenak Nafarroan, Zaldibi-Ataun eta Erga (1.088 m) mendiaren artean kokatuta dago.

Duela milaka urte bizi izan dira Aralarren gure arbasoak. Euskal Herri osoan dagoen hilarri multzorik haundiena hemen dago: 44 trikuharri Nafarroan eta 17 Gipuzkoan. Artzantzak garrantzi handia izan du. Duela 130 urte 800 artzain bizi ziren 40.000 ardiekin.

Ibilbidea: Guardetxe (950m.)-Errenaga (1.288m.)-Igaratza-Irumugarrieta (1.430 m.).

Zailtasun: Erdikoa.

Denbora: 4 ordu (osotara).

Guardetxeko aparkalekuan kotxea utziko dugu. Han Igaratzara doan pista hartu (pista sahiesteko eskizko ibilbide markatua badago, nahi izanez gero), Pago-Mari izeneko larretik pasa eta pistari jarraitu eskuineko aldetik, basoa bukatzen denean maldan gora Errenaga mendixka irabazi arte.

Hemen Nafarroa eta Gipuzkoa arteko mugan gaude. Handik oso gutxira ezkerreko bidea hartuta eta Gipuzkoan barne Igaratzako aterpera hurbildu (ordu eta laurden).

Berriz Nafarroako zatira bueltatu eta txuri-gorriz markatuta dagoen bideari jarraitu Malloako punturik garaienera iritsi arte. Irumugarrieta edo Intzako Dorrea (1.430 m.).

2008. URTEA

URRIA

5 – Jaizkibel mendia, Pasai Donibanetik (Donostialdea - Gipuzkoa)

26 -  Ireber (Arrarats herritik – Basaburua)

AZAROA

9 – Malloak (Aralar)

23 – Larun edo Larrun mendia

ABENDUA

14 – Ernio (Oria Gipuzkoa)

21 – Arga ibaiaren inguruko ibilbidea, Iruñerrian

2009. URTEA

URTARRILA

11 – Bardeak

25 – Sabaiza (Baldorba)

OTSAILA

8 – Beorlegi (Behe Nafarroa)

22 – Mendaur (Malerreka)

MARTXOA

8 – Bioleta (Zaraitzu)

22 – Urkulu (Ibañetatik)

APIRILA

5 – Anboto (Bizkaia)

19 – Agiña (Lesaka inguruan, Bortziriak)

MAIATZA

17 – Dulantz (Urbasa)

31 – Kobazuloen ibilibidea (Urdazubi-Zugarramurdi-Sara, Lapurdi)

EKAINA

14 – Aitzkorri (Gipuzkoa)

28 – Hiru Erregeen Mahaia

Egun honetan aukera paregabea izanen dugu udazkeneko koloreaz gozatzeko.

Ireberrerako igoerako txoko bat.

Basaburua Ibarrak azaleraz 83,5 km² ditu, horietatik 4.000 Ha. baino gehiago pagadiak direlarik. Ultzama Ekialdean, Larraun eta Leitza mendebaldean, Imotz hegoaldean eta Basaburua Txikia (Menor) Iparraldean dira bere mugak.

Ibilbidea: Arrarats (590 m.)-Otsola-Ireber (1.202 m.).

Zailtasun: Erdikoa.

Denbora: 3,5 ordu (osotara).

Bidea herriko elizaren parean hasten da. Ezkerrean pista garbi bat hartu, baserri bat igaro, amildegia eta erreka gure ezkerrean ikusiko dugu eta pistaren goiko aldean Otsola izeneko ibarrera iritsiko gara. Han iturburu eta abere etxola baten artean alanbratua gure eskuinean ikusi, maldan gora mendi lepora hurbildu eta eskuinean Ireber mendia ikusten da. Ireber menditik oso gertu ikusten den mendia Ernaitzu (1.197 m.) dugu.

Arrarats herria

Argazkiak: Ibon Mimentza

Argazkia: Xavier Fargas

Goizeko 8:15-etan da hitzordua, betiko moduan, Iruñeko Zezentegian (Corralillos, Arrotxapean).  8:30-etan aterako gara puntu-puntuan.  Hiru orduko txangoa izango da Dorre Karlisten ibilbidetik, beraz ez genuke Iruñeara 17:00-ak baino beranduago heldu behar.

Anima zaitezte, bertatik gozatu daitezkeen ikuspegiak ikusgarriak direlako: Donostialdea, Pasaia, Errenteria, Txingudiko badia eta itsasoa, bere zabalera guztian, mirestu daitezke han goitik.

Pasai Donibaneko termikatik hasi eta Guadalupeko gotorleku eta santutegira ailegatu gaitezke Jaizkibel mendiaren bizkarretik zehar ibiliz.  Bidean Iskulin izeneko dolmena ere aurkituko dugu.

Ez da ibilbide zaila, beraz, anima zaitezte!

Argazkia: Iñaki Arrieta Baro

Hitzordua: Goizeko 8:15ean Iruñeko zezentegietako aparkalekuan (Corralillos)