Oxigenoa euskarari

Arrakasta handikoa izan zen, aurreko ikasturterako Laudio Udalak bere Euskara Arloaren bitartez euskara praktikatzeko helburuarekin gazteei zuzendutako mendi irteeren programazioa. ‘Oxigenoa Euskarari’ zuen izena eta euskara praktikatzeko ‘Sar ezazu hanka’ programa nagusiagoaren adar bat zen.
Are gehiago, hain izan da ona ekimen honen balorazioa ezen errepikatu ez ezik indartu ere egingo da. Hemendik aurrera, bi ikasturteko programazioa izango da, hau da, iraupen luzeko ekimena.
Irteerekin batera, hainbat ikastaro antolatuko da: elikadura, orientazioa, eskalada, botanika, izar-konstelazioak, sukaldaritza eta abar. Bestetik, txango bakoitzarekin txosten bat osatuko da eta ikasleek, bestetik, euren esperientziak kontatuko dizkigute propio egin duten blog-ean. Beraz, oso ekimen osatua izango da.

Ekimen hau Laudioko ikastetxeetan DBH ikasten duten ikasleei zuzenduta dago. Izena ematen animatzeko, hitzaldi batzuk (diaporama batekin) antolatuko dira, urrian zehar, esandako ikastetxeetan. Haiekin batera, goi mendiko materialen erakusketa.

Egitarauaren zuzendaria herriko Julen Reketa mendizale eta mendi-gidaria izango da eta, lankidetzan izango du Leire Urretxu mendi gidari eta begiralea. Biek Mendiak eta Herriak, S. L. mendi-gidarien enpresarekin lan egiten dute. Txangoetako parte hartzaile kopuruen arabera, bestelako mendi gidariak edo begiraleak kontratatuko dira.
Jarraian, 2010/11 ikasturterako programatuta dauden irteera guztien egitaraua. "Beteranoak" izenarekin jarri izan dira iaz hasi zirenak eta "Berriak" aurten hasi eta 2012ko ekainean amaituko dutenak.

Programa:

EGUNA	TALDEA	MENDIA
2010-10-24	Beteranoak	ARALAR Txindoki
2010-11-14	Berriak	GOROBEL (Untzaga-Urduña)
2010-11-28	Beteranoak	TOLOÑO
2010-12-12	Berriak	URDAIBAI Atxarre/Ereñozar
2010-12-19	Beteranoak	GORBEIA
2011-01-23	Beteranoak	JOAR
2011-01-30	Berriak	ESKALADA-I
2011-02-20	Beteranoak	ARDOAREN BIDEA
2011-02-27	Berriak	TOLOÑO
2011-03-13	Beteranoak	ESKALADA-II
2011-03-20	Berriak	BERIAIN
2011-04-10	Berriak	AIZKORRI
2011-04-16+17	Beteranoak	GOROBEL Iturrigorri - Asteburua
2011-05-15	Beteranoak	ARALAR Malloak
2011-05-7+8	Berriak	GORBEIA- ORIENTAZIOA
2011-06-05	Berriak	ANBOTO
2011-06-24+ 25+26	Berriak	PIRINIOAK (Hiru Erregeen Mahaia + Ori)
2011-06-25 +26+27	Beteranoak	EUSKADIKO ZEHARKALDIA: 1. Arlaban-ANBOTO-Urkiola > Izurtza 2. Izurtza > Urkiola-GORBEIA-Aterpean (Arraba) 3. Arraba-UNTZUETA-Laudio