Urgazi Triatloi Taldea

Arkaitz Irureta elgoibartar eskiatzaileak zilarrezko bi domina irabazi ditu joan den asteburuan. Somporten, iraupen-eski pistan Gipuzkoako Txapelketan egin du balentria Iruretak. Larunbatean modalitate klasikoan 10 kmko ibilbidea egin zuten; atzo, berriz, 30 km estilo librean.

Larunbateko proban 5 kmko ibilbide bati bi itzuli egin behar 
zizkioten, erlojuz kontra 15 segundoko tartean aterata. Honela 
esan digu Arkaitzek berak: "Elurra nahiko motel omen zegoen 
eta jaitsierak ez ziren oso malkartsuak. Horregatik, eskiarentzat 
argizari egokiak aukeratzeak berebiziko garrantzia zeukan jaisten 
denbora asko ez galtzeko. Aukeraketa onegia ez nuen egin, eta 
jaitsieretan denbora galtzen nuela igarri arren bigarren postua 
lortu naban 35 minutuko denborarekin (3 minutu eta 30 segundo
kilometroko).

Igandean, berriz, lasterkari guztiak batera irten ziren. Lasterketa
 irekia zen eta Skating estiloa aukeratu zuten gehienek, bizkorrago 
ibiltzeko. 7,5 kmko ibilbide malkartsuari (horia + berdea + urdina) 4 
buelta eman behar zitzaizkion. Desnibela ere larunbatean baino 
handiagoa zen. "Lasterketa oso ezberdina zen, batzuei distantzia 
motzak hobeto joaten zaizkie luzeak baino; eta batzuk estilo bateko 
lasterketetan hobeto dabiltza bestetan baino. Hala ere, berriz ere 
bigarren postua lortu naban, oraingoan 3 min/km erritmoan, bezperan 
baino azkarrago; 30 km egiteko ordu eta erdi eginaz", esan digu 
Arkaitzek.

Aurten Iraupen eskian egin duen lehen lasterketa izan da eta harro dago
oso elgoibartarra: "lehenengo itzulia motel egin nuen modalitatera ohitzen, 
baina hankak berotu eta soltatzea lortu nuenean, azken hirurak erritmo 
bizian egin ahal izan nituen, eta niretzat ere sorpresatxoa izan zen. 
Hirugarren itzulirako, jendea onenak emanda zegoenean, ni 
orduan onenean sartzen. Itzuli horretan jende asko pasatu naban".

Zalantzarik gabe, eskia gero eta indar handiagoa hartzen ari da Elgoibarren eta 
espezialistak ere gero eta trebatuago daude. Datorren asteburuan izango dute 
hurrengo hitzordua, Europako mendietako Regil zeharkaldian.
Zorionak eta segi horrela!