Haurdunaldiari buruzko liburuak

Normal joan da asteburua. Isiltasunari eutsi beharrak sortzen duen zailtasunarekin eta konplizitatearekin. Ostiralean, lanetik atera eta etxerako bidean haurdunaldiari buruzko libururen bat erostea erabaki nuen, E-ri oparitzeko. Euskaraz zer dagoen begiratu, eta ezer gutxi, ia ezer ez. Arantxa Iturberen ‘Ai ama’ etorri zitzaidan gogora, eta Karmele Jaioren ‘Amaren eskuak’. Lehenengoa, ondo dago, baina ez da nahi nuena: haurdunaldiak dakartzan zalantzak, galderak, aldaketak, kazkak eta antzekoak erakutsi eta gustura irakurtzeko zerbait. Bigarrena nobela da, literatura. Eremu handiko saltoki handi horietako bat dago etxerako bidean, eta han sartu nintzen. Autolaguntzako liburu ugari aurkitu nituen, eta sukaldaritzakoak, eta sexuari buruzkoak, eta masajeak, eta gaztelerazko liburu salduenen edizio merkeak. Baina, harritzekoa, haurdunaldiari buruzko ezer ez. Gaur egun, ordea, eremu handiko saltoki gehienetan bada Ama Lurraren aitzakian multinazional handia bihurtu den Natura horietakoren bat, eta han aurkitu nituen nahi nituen liburuak. Baziren haurdunaldiari buruzko bospasei, denak gazteleraz, noski. Haietako batekin atera nintzen. Izenburua: ‘Nueve meses de espera. La guía definitiva del embarazo, parto y postparto’. Egileak: Josefina Ruiz Vega eta Maria Concepcion Diez Ruibo. Argitaratzailea: Temas de Hoy, 2004. Orrialdeak: 472. Prezioa: 21,25 euro. Liburu horren orrialdeetan kateatuta eman du asteburua E-k. Eta nik ere igaro ditut ordu batzuk lerro artean. Liburu ona da, egia esan. Prediktorrak bi marra arrosa paraleloak erakutsi ondoren kabitu ezinik dagoen bikotearen irrika asetzen joateko. Gainontzean, asteburuan ez gara afaltzera-edo atera, ez koadrilako lagunekin, ez senideekin. Beraz, poteoan alkoholik ez edateko aitzakia, edota otorduetan haragia edo enbutidoak eta antzekoak ez jatearena ez dugu asmatu behar izan. Egunak aurrera doaz, eta dena lasai oraingoz. Amaginarekin bihar du hitzordua E-k.