bazterrean

Hemen atxikitu dudan egutegia, Googleren zerbitzu batena da. Googlecalendar dauak izena zerbitzuak, eta bertan bakoitzaren eginbeharrak... jar ditzakezu. Bertan, nik ikasten dudan lizentziaturaren ikasgaien datak azaltzen dira.

Lehengo ostegunean entzundako hitzaldian, hau da, Cómo sobrevivir a la sociedad del conocimiento hitzaldian, gaur egun bizi garen informazioaren gizarteari buruzko hainbat gauza interesgarri esan zirela uste dut. Bere izenarekin gogoratzen ez banaiz ere, filosofoak esaten zuen gaur egun informazio gehiegi genuela eskuragarri, eta hori izan zen bere hitzaldiaren tesi nagusia. Ni guztiz bat nator berak esandakoarekin, izan ere, ikusi besterik ez dago interneteko edozein bilatzailetan zerbaiten inguruan informazioa bilatzen hastean gertatzen dena. Bilatzailean egin nahi den bilaketarako gakoak idatzi orduko, bilaketarekin erlazioa duten hainbat orrialde irekitzen zaizkigu. Orrialde horien guztien artean aukeraketa bat egiteko garaia iristen da orduan, interesgarrienak aukeratuz eta beste hainbat baztertuz.

Internetekoa adibiderik garbiena izan daiteke, baina interneteko munduaz aparte ere, informazioaren gizartean bizi garela gauza jakina da. Gaur egun, egunean gertatzen diren albisteak interneten, irratian, telebistan edota egunkarietan ikusi ditzakegu, hau da, informazio asko gure eskura egoteaz gain, informazio hori iturri edo medio ezberdinetatik jaso dezakegu.

Hitzaldian filosofoak esan zuen bezala, gaur egungo gizartean gehiegizko informazioa dago, eta horrek nire ustez, alde onak eta txarrak ditu. Alde batetik, iruditzen zait edozein gairen inguruan informazio asko eta ezberdina egotea oso gauza ona dela, azken finean informazioa kontrastatuz pertsona bezala hezi eta gure iritzi kritikoa lantzen dugulako. Baina gaur egungo gizartean dugun gehiegizko informazio horri arazo bat ikusten diot; izan ere, nik uste dut gaur egun informazio asko dagoen arren, informazio gehiena pentsamendu bakarraren bidean doala, nahiz eta zorionez gaur egun oraindik kontrainformazioari leku bat egiten zaion.

Finean, uste dut informazioa modu zintzo batean ulertuta beti dela ona, baina modu txarrean eta interes konkretu batzuen arabera ere erabili daitekeela uste dut. Horregatik, informazioz gainezka bizi garen honetan, oso garrantzitsua iruditzen zait bakoitzak bere irizpide propioak izatea eta irizpide horien arabera, informazio jakin bat aukeratzea eta beste bat baztertzea. Horrela ez bada, gaur egungo informazio uholdeak artalde bereko kide bilakatu gaitzakelako guztioi.