M!ntza daitezela argazkiak

Larunbateko manifestaldiko pelikulatxoa osatu dugu, hiru lagun argazkilarik utzitako irudiekin. Gontzal Agote, Dani Parraga eta Roberto Perez Elortzaren argazkiak ikusi nahi badituzu, klikatu hemen

Kaleak bete m!ntzo

Bihotz-bihotzez, esker mila guztioi. Manifestaldira deitu zenuten hamaika euskaldunei. Deialdia sostengatu zenuten dozenaka erakunde, sindikatu, gizarte talde eta politikariei. Giroa alaitu zenuten fanfarre, dantzari, joaldun, erraldoi, txistulari, trikitilari eta gaitariei. Sosa biltzen, trafikoa zaintzen eta kamisetak saltzen lanean aritu zineten boluntario prestuei. Joan den larunbat arratsalde kiskalgarrian, Iruñeko karriketan Euskalerria Irratiaren alde ozen mintzatu zineten milaka lagunei, mila esker mila!

Azken aleak

Bularrak ozen mintzatzen ari dira. Esan nahi baita ehunka kamiseta saldu genituela larunbateko manifestaldian, eta ordutik nonahi ikus daitezkeela bularrean gure kanpainaren leloa daramaten lagunak.

Zenbait talla agortu dira. Argi dago, beraz, zein izanen den aurtengo Sanferminetako kamiseta. Kasu, azkar mugitzen ez bazara elastikorik gabe geratuko zara eta.

Azken aleak Karrikadendan daude salgai (Xabier karrika, 22). 

M!ntza daitezela hormak

Dagoeneko prest da manifestaldirako kartela. Gure lagun baten, Nabarreria enpresako disenatzaile Joseba Beramendiren lana da. Aurki ikusiko duzue karriketan, lantegietan, ikastetxeetan, tabernetan, liburutegietan, harakindegietan, okindegietan, ziguluetan inbertitzeko enpresetan... Beno ez, azken horietan ez.

Buru-belarri ari gara agit-prop kanpainan. Irratirako iragarkiak prest dira. Laster eskegiko ditugu blogean. Eta aurki kamisetak aterako ditugu. Beraz, adi!

Maiatzaren 27an, m!ntza kalean

Herritarrek Euskalerria Irratiaren alde ozen mintzatzeko aukera izanen dute maiatzaren 27an. Hitzordua, arratsaldeko seietan, Iruñeko Autobus geltokian. Leloa, “M!ntza: Euskalerria Irratia, eskubide osoz ”.

Deitzaileak irratiaren entzule, lagun edota kolaboratzaile diren hamaika gizon eta emakume dira, bakoitza bere gisakoa, desberdinak, normalak, gizarte honetakoak, euskaldun korrienteak.

Gobernuak euskararekiko duen jarrerak harritu egiten ditu hamaika herritarrok. Haien idurikoz, Gobernuak, lizentzia Euskalerria Irratiari ukatuz, haiek ere baztertu ditu. Euskaldun guztiak baztertu ditu.

Horregatik guztiagatik deitu dute manifestaldira: euskaldunok, gizarte honetako partaide garenez, gizarte honetan geure lekua izateko eskubidea dugula aldarrikatzeko. Euskalerria Irratiarentzako lizentzia exijitzeko. Nafarroako Gobernuaren jokaera zikin eta zakarra salatzeko. 

Entzun gaitzaten, m!ntza gaitezen kalean.

Deitzaileak:

Edurne Arrizibita (Karrikiri elkarteko kidea), Kike Diez de Ulzurrun (itzultzailea), Pello Eltzaburu (editorea), Inma Errea (idazlea), Arrosa Gaintza (administraria), Blanca Izkue (musikaria), Esperantxi Kondearena (Euskalerria Irratia elkarteko bazkidea), Mikel Juaniz (La Pamplonesako musikaria), Mikel Lasarte (Ilundaingo Baserri Eskolako zuzendaria), Pedro Otaduy (Iturrama Institutuko zuzendaria), Ainara Santakiteria (SOS Arrazakeria taldeko koordinatzailea).

M!ntza praktika

Herritarrak mintza daitezela Euskalerria Irratiaren aferaz. Horixe da nahi duguna.

Manifestaldira deitu duten hamaika pertsonek manifestu bat prestatu dute. Horrekin bat egin daiteke. Baina bada sostengua beste modu batean adierazterik, bakoitzak nahi duen moduan hain zuzen ere.

Herritarren, taldeen, erakundeen sostengua nahi dugu. Mintza, beraz, argi, ozen, libre.

Klikatu hor azpian Erantzunak dioen ikurra, eta esazu nahi duzuna.

Manifestua:

Euskalerria Irratiak Iruñerriko euskaldunei komunikazio zerbitzu funtzional eta baliozkoa eskaintzen die.

Nafarroako agintariek irratiari emititzeko baimena behin eta berriro ukatuz darabilen jarrera salatzen dugu.

Euskaldunon eskubidea delako eta Eusklerria Irratiak merezi eta behar duelako, emititzeko baimen administratiboa eman diezaiola eskatzen diogu Nafarroako Gobernuari.

Aupada eta sostengua Euskalerria Irratiari. Salaketa Nafarroako Gobernuari. Baimena Euskalerria Irratiari.

Sostengurik irmoena

Mintza zaitez irmo Euskalerria Irratiaren alde. Egin zaitez Euskalerria Irratia Elkarteko bazkide. Foru Gobernuak lizentzia eta laguntzak ukatzen dizkigu. Gizarteak lanean segitzeko sostengua ematen digu.

Iragarleak dauzkagu. Zenbait diru laguntza jasotzen dugu. Baina Euskalerria Irratia Elkarteko bazkideak dira gure altxorrik preziatuena. Izan ere, erakusten digute herritarrek gure proiektua estimatzen dutela, beharrezkotzat jotzen dutela, beretzat sentitzen dutela.

Bazkideek urtean 72 euro ordaintzen dituzte. Bazkidetu nahi baduzu, deitu 948 17 01 51 telefono zenbakira, edo bidali mezua administrazioa@euskalerriai.com helbidera.

Eman beharreko datuak dira izen-abizenak, helbidea, telefono zenbakia, kontu korronte zenbakia eta ordainketa zenbat epetan egin nahi den (18 euro hiru hilero, 36 sei hilero edo 72 urtean behin).

Bazkidetu zaitez!

Irregulartasunez beteriko prozesua

Nafarroako Gobernuak beste behin ere emititzeko lizentziarik gabe utzi du Euskalerria Irratia, Iruñerriko irrati euskaldun bakarra. Erabakia apirilaren 10ean eman zuen ezagutzera. Irregulartasunez beteriko prozesu baten beste episodio ilun bat izan da.

Hasieratik, irizpide politikoak nagusi

Auziak 1998an du sorburua. Orduan, Gobernuak Iruñerrirako bi irrati lizentzia banatzeko lehiaketa egin zuen. Prozesuaren lehen fasean, teknikoek osaturiko epaimahaiak lehen postuan utzi zuen Euskalerria Irratia. Bigarren fasean, berriz, arduradun politikoek, batere oinarririk gabe, puntuaketa irauliz Opus Deiren Unibertsitateari eta Net 21 irratiari eman zizkioten lizentziak.

Epaileek arrazoia eman ziguten

Euskalerria Irratiak erabakiaren aurkako helegitea aurkeztu zuen. Eta, iragan abenduan, Nafarroako Auzitegi Nagusiak arrazoia eman zion: arduradun politikoek, Jose Ignacio Palacios kontseilariak eta Angel Sanz Barea idazkari nagusiak, ez zuten oinarririk egin zutena egiteko eta lehiaketaren bigarren fasea errepikatu behar zen.

Bigarren fasean bideragarritasun ekonomiko, tekniko eta periodistikoa aztertu behar ziren. Epailearen aginduz, alor horien inguruko azterketa egin zuten hainbat perituk. Azterketa independenteak ziren. Eta Euskalerria Irratia proiekturik onena zela zioten.

Neurrira egindako txostenak

Nafarroako Gobernuak, baina, bazterrean utzi zituen txostenok eta, interes politikoen arabera herritarren sosak xahutuz, azterketa berria eskatu zion Doxa izeneko kontsultoriari. Doxak Gobernuarentzat lan egin ohi du. Eta gauza jakina da bezeroak arrazoia duela beti. Doxaren txostenean oinarriturik, eta Parlamentuak zein epaileek zalantzatan jarritako Angel Sanz Barea mahaiburu mantenduz, Gobernuak lizentziak berriro Opus Deiri eta Net 21ri eman zizkion.

Borroka judiziala ez da amaitu

Joera kezkagarria, Nafarroako Gobernuarena. Izan ere, argi dago interes pertsonal eta alderdikoien arabera erabiltzen ari direla botere publikoa, jakinaren gainean erabaki oker bezain bidegabeak hartuz. Behin eta berriz, gainera. Horrek guztiak badu izenik alor penalean. Eta Euskalerria Irratiaren abokatuak horixe aztertzen ari dira. Oraingoz, ez dugu jaso erabakiaren jakinarazpen ofizialik. Eskuratzen dugularik erabakiko dugu zer bide segitu erabakiaren zein erabakiaren egileen aurka.

Kronologia

1998ko uztailaren 6a: Nafarroako Gobernuak Euskalerria Irratia baimenik gabe utzi zuen, Iruñerrirako irrati lizentzien banaketan.

1999ko otsailaren 2a: Nafarroako Parlamentuak lizentzien banaketa aztertzeko batzordea osatzea erabaki zuen.

1999ko apirilaren 14a: Nafarroako Parlamentuak lizentzien banaketa gaitzetsi eta lehiaketa errepikatzeko eskatu zuen.

2004ko abenduaren 16a: Nafarroako Hizkuntza Politikak diru laguntzarik gabe utzi zuen Euskalerria Irratia, emititzeko baimena ez zuela argudiatuz.

2004ko irailaren 3a: Europako Kontseiluak irratiaren egoera bidegabea nabarmendu zuen, Nafarroako Gobernuaren hizkuntz politikaren inguruko txostenean.

2005eko abenduaren 24a: Nafarroako Parlamentuak irratiaren aldeko mozioa onartu zuen, irratiaren egoera konpontzeko eskatuz. UPN bakarrik geratu zen.

2005eko abenduaren 30a: Nafarroako Auzitegi Nagusiak bertan behera utzi zuen 1998ko irrati lizentzien banaketa, eta lehiaketa berriz egiteko agindu zuen.

2006ko otsailaren 1a: 1998ko banaketan lizentzia lortu zuen Net 21 irratiak ateak itxi zituen, arazo ekonomikoak zirela kausa.

2006ko martxoaren 23a: Irratiak 'Entxuferik gabe' irratsaioa zuzenean egin zuen, Nafarroako Antzerki Eskolan. Legeztatzea izan zen festako aldarrikapen nagusia.

2006ko apirilaren 10a: Nafarroako Gobernuak jakitera eman zuen lizentziak berriro ere Opus Deiri eta Net 21ri emanen zizkiela.

2006ko maiatzaren 10a: Hamaika herritarrek manifestaldira deitu zuten, beste behin ere aldarrikatzeko Euskalerria Irratiaren legeztatzea. Hitzordua, maiatzaren 27an, arratsaldeko seietan, Iruñeko Autobus geltokian.

Hemezortzi urteko irrati heldua

Euskalerria Irratiak 1988ko azaroaren zazpian aireratu zuen lehen saioa. Iruñerriko lehen irrati euskalduna zen. Da. Aurreko urteetan, hainbat irratik euskarazko saioak egin zituzten, baina egoera politikoaren ondorioz, emanaldiok emeki-emeki desagertu egin ziren.

Berrogei euskaltzalek sortu zuten irratia. Bakoitzak 100.000 pezeta jarri zituen eta kapital horrekin Iruñeko Komunikabideak izeneko enpresa sortu zuten. Haren oinarrietan, zehaztu zuten haiena komunikabide independentea izanen zela idologikoki, politikoki zein ekonomikoki.

Hasieratik, bazkideak oinarri

Halaber, Euskalerria Irratia Elkartea eratu zuten. Ehunka bazkide lortu zituzten, eta haiek ordainduriko kuotak sostengu ezinbestekoa izan ziren irratiaren lehen urratsetan. Egun ere, makulu garrantzitsuak dira.

Lehendabiziko urteak gogorrak izan ziren. Baina emeki-emeki irratiak entzule, iragarle, bazkide talde mardula lortu zuen. Egun proiektu sendoa da. Irratiak 12 langile ditu, eta kazetaritzari zein alor komertzialari doakionez azken urteetan, traba guztien gainetik, etengabeko hazkundean ari da.

Egunero, zortzi ordu  

Egun, Euskalerria Irratiak astelehenetik ostiralera zortzi orduz emititzen du. Goiz, eguerdi eta bazkalondoko albistegiak erreferentzialak dira programazioan. Goiz zein arratsaldez, bi orduko magazinak egiten ditugu: Karrikoluzio eta Arratsalde.on, hurrenez hurren. Gauean, musika saioak izaten dira. Eta azken urteotan asteburuko programazioa ere zabaltzen ari da, Asteroidea saioarekin eta Osasunaren futbol partiden kontakizunarekin.

Finean, gurea heldutasunera iritsi den 18 urteko irratia da. Hainbat traba pairatu duena. Hainbat sostengu jaso duena. Profesionala. Herrikoia. Independentea. Bizia.