Gaur arratsaldean Fermin Muguruzari egindako elkarrizketaren aurrerapena aireratu eta sareratuko du irratia.com irratsaioak Bilbo Hiria irratiaren sintonian. Iragan astean kaleratu zen Fermin Muguruzaren disko berria, "Euskal Herria Jamaika Clash" goiburukoa. Gaur gauean ETB1ek emango du Fermin eta lagunen jamaikako ibileren berri ematen duen dokumentala, baina aurrerapen gisa oso kontu interesgarriak aipatzen ditu Ferminek Gaubasako Anartz Bilbao eta Jabi Zabalarekin egindako solasaldian.
Elkarrizketa luzea izan zen eta, beraz, gaurkoa aurrerapena baizik ez da izango. Berau osorik entzuteko aukera izango da aurrerago Gaubasa irratsaioan. Arratsaldeko 6etatik aurrera izango duzu entzungai saioa Bilbo Hiriaren zuzeneko emisioan, eta bihartik aurrera podcast eran, beti bezala.
Duela bi hilabete aurkeztu zuen Bilbo Hiriak bere webgune berria, zuzeneko emisioaz gain, igorritako irratsaio guztiak mp3 formatoan biltzen dituena. Podcast eran harpidetza egiteko aukera ematen du. Gainera, iragan astean dexente hobetu zuen zuzeneko emisioaren kalitatea.
