Elgoibartarrak eski gainean

Joan zen domekan, otsailaren 15ean, Euskadiko koparako puntuagarria den eski alpinismoko lasterketa jokatu zen Astun eta Candanchu artean; Aragoi Bailarako Rallya.

Aste osoan elurte eta elur jausi arrisku handiak izan ziren eta oraingoa ere pista barruan, segurtasun eremuan proba motz bat izango zela uste zen arren, azkenean elurra azkar eraldatu eta proba luze eta segurua egin ahal izan genuen.

Candanchuko errepideko sarreratik hasi zen proba. Raca Astuneko eski pistako gailurrik handienera hiru aldiz igo ziren lasterkariak, hiru ibilbidetatik. 1700 metrotik gorako desnibel metatua egin ostean Astuneko parkinean bukatu zen lasterketa.

Hiru elgoibartar aritu ziren proban: Eñaut Izagirre gazteetan, eta Iñigo Lariz eta Arkaitz Irureta seniorretan

Denboraldiaren erdia pasa dute eta eskiatzaile elgoibartarrak gustura daude orain arte loturikoarekin: “aurrean dagoen talde batean sartuta gaude, lasterketan gure artean lehia polita egoten da, eta horrek arinago joatera eta akatsik ez egitera behartzen gaitu. Bestela, segituan galtzen dira postuak”, zioen Larizek, lasterketa amaieran pozik.

Bi astez geldirik egon ostean, martxoaren 7-8an izango dute hurrengo hitzordua, Europako Mendietan, Andres Regil mendizale bizkaitarraren omenezko probaren 34 ekitaldian. Altitoyren ondoren urteko bigarren proba garrantzitsuena izango da euskaldunentzat. Euskal Mendi Federazioak antolatzen duen bigarren lasterketa izango da eta bi zati izango ditu: larunbatean erlojuaren kontrako proba izango da, eta igandean orain dela 34 urte egin zen proba, binaka.

Partaideen kopurua mugatua izango da eta oraingoz 7 elgoibartar arituko dira lehian. Hala ere, itxaron zerrendan gehiago ere badaude. Zorte on!