Urretxu Zumarragako Bertso Eskola

Iragan larunbatean jarri zen abian aurtengo Martxoan bertsoa, bertsolaritza sustatu eta bultzatu asmoz Zumarraga-Urretxuko bertso eskolak laugarren aldiz antolatu duen ziklo kulturala.

Herriko bertsolari txapelketako lehenengo kanporaketak eman zion hasiera zikloari, eta urtero gertatzen den bezala, arrakasta erabatekoa izan zen.

Motz taberna leporaino beteta zegoen saioa hasi baino ordu erdi lehenago eta bertsolariek haseratik gozatu zuten entzuleek emandako babesa eta berotasuna.

Beroa izan zen, era berean, saioko beste protagonista, taberna jendez leporaino beterik egoteak merkurioa zerura igo baitzuen lanek aurrera egin ahala.

Lau talde lehiatu ziren larunbateko saioan. Antton Fernandez, Uxue Fernandez eta Eli Lasak osaturiko Lasatarrak, Iñaki Larrañaga, Eugenio Gisasola “Lutxurdio” eta Aitor Zabaletak osaturiko Trikitilariak, Iker Soraluze, Asier Murua eta Aitor Lizarazu “Ginz”-ek osaturiko Galaktikoak eta Iguntze Aseginolaza, Ekain Aseginolaza eta Itziar Pildainek osaturiko Pitxitxiak taldeak.



Bertsoen maila eta kalitatea asko hobetu da herriko bertsolari txapelketa ospatu zen lehenengo urtearekin alderatuz, eta larunbateko saioa horren adibide izan zen, aste honetako saioetan izango dugunaren aurrekari izateaz gain.



Akats oso gutxi izan ziren saioan zehar eta bertsoak kantatzeko orduan partaideek arintasuna izan zuten ezaugarri nagusi. Azkenean, lehia estuaren ondoren, Lasatarrek lortu zuten martxoaren 31an Gaztelekun jokatuko den finalerako txartela. Antton eta Uxuek lan oso txukuna burutu zuten eta Eli Lasa debutariak txunditurik utzi zituen entzuleak bere kantakera garbi, fin eta zuzenarekin.