Urretxu Zumarragako Bertso Eskola

Iragan asteburuan jokatu dira herriko bertsolari txapelketako bigarren eta hirugarren kanporaketak, eta dagoeneko erabaki da zeintzuk izango diren hilaren 31ko final handiko hiru taldeak.

Aurreko astean Motzen Lasatarrek finalerako txartela eskuratu ostean, ikusmin handia zegoen gainerako taldeek egingo zuten lana gertutik jarraitzeko.

Eta kanporaketak erabat arrakastatsuak izan direla azpimarratu beharra dago.

Ostiralean Fox tabernan zuten hitzordua bertsozaleek; taberna leporaino bete zen beste behin ere, Trumoitxoriak (Igor Susaeta, Mikel Zabalo, Aitor Otegi), Txapeldunak (Gorka Erostarbe, Gorka Ganuza, Gorka Ojanguren) eta Mihiluzeak (Manex Mantxola, Asier Auzmendi, Gorka Azkarate) taldeen lanaz gozatzeko.

Eta izan zen, tarteka goia jo zuen bertsoaldirik. Saioa maila politekoa izan zen orohar, akats gutxikoa eta erritmo handikoa eta Mihiluzeak izan ziren epaileen erabakiz puntu gehien merezi izan zutenak.

Gainerakoen lana ere azpimarragarria izan zen.