Gaur euria ari du
Ordenagailuaren pantailari begira ari naiz, eskuarekin eginiko mugimenduek sarean barna noraezean naramaten bitartean. Egunkarien lehendabiziko orrialdeak ikusten ari naiz supituki, eta mina besterik ez dut sentitzen titularrak irakurtzean. Berrogeita sei. Berrogeita sei atxiloketa agindu dituzte. Hogeita sei antzemanda.
Ez dakit ikusten ari naizena egia den edo jada nekearen eta nire irudimenaren txantxa ote den. Zoritxarrez ordea halakoak egunerokotasunaren zati bihurtu dira gurean. Erasoak, irainak, atxiloketak, torturak… Edonork ez du gure egunerokotasunaren inguruko daturik sinisten. Ikusi egin behar da sinisteko. Bizi egin behar da sinisteko. Eta hala ere sinestezina da. Iguingarria. Nazkagarria.
Ez, ez da nire imaginazioaren emaitza. Mezu bat bidali dit lagun batek. « Euria ari du gaur. Euri azidoa ».
Iruzkinak
aterkia 2007-12-03 23:55 #1
Egoerari buelta emango diogu!
Hara zer zioen duela 30 urte pasatxo Pantxoa eta Peiok kantatzen zuten "Aita kartzelan duzu" kantuaren letrak.
"Aita kartzelan duzu,
ama ixkutuan duzu...
Euskal Herriaren gain, haurra,
gaur iguzkirik ez dugu...
Egizu lo, egizu...
Zomorroari ez beldur,
aita azkarra da ta
ama atzarrik baituzu...
Bihar goizean goizik
iguzki izanen duzu...
Aita kartzelan duzu...
Zomorroa atzarrik baita,
gaur ilunpean gaituzu...
Bihar esnatu eta
ardi esnetik emanen...
Esnea edan eta
laster gizondu zaite.
Ta aita lagundu zazun,
zomorroaren hiltzen...
Aita kartzelan duzu...
Zomorroa hil eta, haurra,
iguzki izanen duzu...
Urre gorria baita
gure munduan nagusi,
zuretzat nahi ditugu
urre kataiak autsi...
Bihar izan dezazun
amodioa nausi!...
Kartzela hutsik duzu!
Hamar ziren, nun dituzu?
Lur azpitik igesi dira
eta bidean dituzu...
Irriño bat egizu, haurra,
aita bidean baituzu!
Aitaren besoetan, haurra,
bihar lo eginen duzu..."
LO EGIN SOILIK ATSEDEN HARTZEKO, AMESTEN JARRAITZEKO, BAINA EZ GAITEZEN LOZORROAN GERATU EURI AZIDO ETA HODEI ILUNEN AURREAN.
*
Utzi iruzkina: