Lehortetik ihesi

Lau tolestura soilez paperezko amodio bat eraiki dizut. Eta oparitu. Eta azaldu, zeinen perfektua den, orban beltzik eta itzal ilunik gabea... Zeinen erraz molda daitekeen bion gustura eta, zeinen eder kolorezta dezakegun, guk nahi bezala.

Baina, zera esan didazu, nahiago duzula birziklatutako maitasuna, apurtutako haren hautsetatik jaioa, berri bat baino.

Eta orbanez betetako haren gainean pintatu ditugu gaurkoa eta biharkoa, oraingoz. Bai, apur bat ximurtuta dago, baina, oraindik asko dugu bertan pintatzeko.