Blogak.com

Sortu blog berria   Sar zaitez blogera

2010/09/06 22:18:38.370 GMT+2

Kulturistak

Kulturgintza oso gutxi aipatu dut nik blog honetan ia 4 urte hauetan. Oso gutxi. Gaur horri lotu nahiko diot.

Oporretara ospa egin aurretik, Ahoa bete hots jardunaldiak izan ziren. Eta han aurkeztu zuen Lorea Agirrek ponentzia bat. Kulturgintza eta hizkuntza batzen zituena. Gero Xabi Strubellek ere musikagintza eta hizkuntza batu zituen beste artikulu batean. Eta baita Ramon Agirrek ere beste batean. Eta Pako Aristik hirugarren batean. Eta udaltop-eko jardunaldietan Aritza Escandonek esandakoak ere hartu nahi ditut gogoan.



Barruko merkatua zaindu eta mimatu behar dugu, kanpoko merkatua zaindu eta mimatuz era berean. Gauza batzuetan inoiz ezin izango dugu lehiatu ondoan ditugun bi (hiru?) hizkuntza erraldoiekin. Baina beste gauza batzuetan gure lekutxoak eta txokoak egin behar ditugu, gozoak batzuk, handitsuak besteak, erraldoiak bestetzuak, ...

Nork: garaigoikoa.2010/09/06 22:18:38.370 GMT+2
Etiketak: kulturgintza hizkuntzaren soziolinguistika soziologia sl | Permalink | Erantzunak (1) | Errenferentziak: (0)

2010/09/02 20:43:17.924 GMT+2

Soziolinguistikaz berripapera: 29. zenbakia

Uztaila amaierakoa bada ere, hona azken soziolinguistikaz berripapera.

SOZIOLINGUISTIKA KLUSTERRA

EUSKARA KOMUNIKATU? NOR-NORI-NORK: KRONIKA, MATERIALAK ETA BIDEOAK ESKURAGARRI

Bi egunetan zehar, euskararen sustapenerako komunikazio-ekintzak burutzeko moduaz jardun genuen 75 bat lagunek Donostiako Miramar Jauregian. Soziolinguistika Klusterrak antolatutako Euskara komunikatu? Nor-nori-nork ikastaroak hizkuntza-plangintzan dabiltzan profesionalak eta komunikazio-gaietan adituak bildu zituen, besteak beste. Pilar Kaltzada eta Belen Uranga izan dira zuzendariak; irakasle-talde jantzia eta anitza izan du oinarri, eta ikuspuntu ezberdinetatik jorratu da gaia.

Dagoeneko eskuragarri daude hitzaldien bideoak, hizlariek erabilitako aurkezpenak, ikastaroaren kronika, twitter jarraipenaren bilduma, argazkiak eta abar

Informazio gehiago: http://www.soziolinguistika.org/ehuikastaroa

 

ABIAN DA III. HAUSNARTU EUSKAL SOZIOLINGUISTIKA SARIETARAKO DEIALDIA

Soziolinguistika Klusterrak III. HAUSNARTU – 2010EKO EUSKAL SOZIOLINGUISTIKA SARIETARAKO DEIALDIA abian jarri du Gipuzkoako Foru Aldundiaren eta Eusko Jaurlaritzako Hizkuntza Politikarako Sailburuordetzaren laguntzarekin.

Soziolinguistika Sarion helburua euskal soziolinguistika teoriko edota metodologikoaren garapena eta berrikuntza indartzea da.

Xede horrekin, deialdi honetan garapen teorikoa, metodologikoa eta saiakera-arloko lan hoberenak sarituko dira. Kontuan hartuko dira, nolanahi ere, euskararen gaineko berariazko garapen teorikoak nahiz kanpoan landutako gerapenetatik abiatuta gure hizkuntzaren egoera aztertzeko eta ulertzeko egokitzapenak.

Informazio gehiago: http://www.soziolinguistika.org/node/4381

 

BAT ALDIZKARIAREN 75. ZENBAKIA KALEAN

BAT Aldizkariaren 75. zenbakia Euskararen presnetzia unibertsitatean izeneko alea kaleratu du Soziolinguistika Klusterrak. Aldizkariak eskaintzen dituen lanak honakoak dira:

  • Hitzaurre gisa. Pablo Sotés

DOSSIERRA

  • Nafarroako Unibertsitate Publikoa. Pablo Sotés
  • Elebitasunetik eleaniztasunera Euskal herriko Unibertsitatean: Eleaniztasun plana.Jasone Cenoz
  • Euskararen presentzia unibertsitate-mailan Iparraldean. Battittu Coyos
  • Eleaniztasun gehigarriaren erronka: HUHEZIko hizkuntza plangintza Irakasle Ikasketetan. Pilar Sagasta, Karmele Perez, Begoña Pedrosa, Eneritz Garro
  • Euskara sustatzeko politika UPV/EHUn: Plan Gidaria. Jon Irazusta
  • Eleaniztuna eta euskalduna, baita mundu akademikoan ere: posible ote? Ludger Mees
  • Hizkuntzen ikasketa sustatzea Kataluniako goi mailako hezkuntzan: Pompeu Fabra Unibertsitateko (UPF) ELEANIZTASUNERAKO EKINTZA PLANA (2007-2013). Carmen Pérez-Vidal
  • Ekonomia K-z ere idazten da.Joseba Barandiaran
  • Gaurko komunikazioa biharko gizarteari begira. Pilar Kaltzada
  • Galeseko unibertsitateetan galesera sustatzearen pozak eta frustrazioak. Colin H. Williams

GUREAN

  • Hizkuntza-ekologia eta jasangarritasuna, globalizazioan: euskarari begira. Maria-Jose Azurmendi
  • Hizkuntza kudeaketa enpresetan globalizazio aroan: lau enpresetan dinamikak, ikuspegiak eta posizio berriak. Daniel Hermosilla, Juan Jose Arrospide, Maria-Jose Azurmendi

AIPAMEN BIBLIOGRAFIKOA

  • Hezkuntza eleanitza bidean: euskal hezkuntza, nazioarteko ikuspegitik begiratuz. Maria-Jose Azurmendi

 

SOZIOLINGUISTIKA KLUSTERRA FACEBOOK ETA TWITTER-EN

Soziolinguistika Klusterrak Facebook eta Twitter-eko kontuak ireki berri ditu. Tresna hauen bidez, bere jardunaren berri izateko beste aukera bat aukera eskaintzen du, honela. Klusterrak bere lankideekin, bezeroekin edo soziolinguistikaren inguruan interesa duen edonorekin harreman zuzena izateko asmoz eman du sare sozialetara jauzia.

Euskara komunikatu: nor-nori-nork ikastaroaren Twitter jarraipena izan da tresna hauen bidez burututako lehen komunikazio ekintza eta aurrerantzean edukiak zabaltzen jarraitzea da asmoa.

Animatu eta egin zaitez Klusterraren facebook-eko orriaren zale eta twitter-eko jarraitzaile!

Informazio gehiago: Facebook eta Twitter

EKIMENAK ETA KANPAINAK

"MUGARIK GABEKO TELEBISTA" KANPAINAN JASOTAKO SINADURAK ONTZAT EMAN DITUZTE ETA LEGE PROIEKTUA ATERATZEKO PROZESUAK AURRERA DARRAI

[Plazaberri]

"Mugarik gabeko telebista" kanpainak ezarritako helburua lortu du, eta hala onartu du, idatziz, Espainiako Hauteskunde Erroldaren bulegoak: bertan entregatu dira 651.650 sinadura, horietatik 559.759 ontzat eman direlarik. Hortaz, herri ekimenari esker, pausorik garrantzitsuena eman da, eta lortu behar zen sinadura kopurua erraz gainditu da. Acció Cultural del País Valencià elkarteak adierazi duenez, lanean dihardu, lege proiektu bat aurrera irten dadin.

Informazio gehiago:

http://www.euskaltzaindia.net/index.php?option=com_content&Itemid=1&catid=121&id=789&lang=eu&view=article

 

ARABAKO ARLO SOZIO-EKONOMIKOAN EUSKARAREN ALDE LAN EGITEN DUTEN ENTITATE EDOTA PERTSONAK SARITUKO DITUZTE LAZARRAGA SARIEK

[Sustatu]

Lan munduarekin eta euskararekin lotutako Lazarraga Sariak aurkeztu dituzte Lorena López de Lacalle, Arabako Euskara, Kultura eta Kirol diputatuak, eta Rober Gutiérrez, Ziurtagiriaren Elkartearen zuzendariak gaur goizean Arabako Foru Aldundian egin duten prentsaren aurreko agerraldian. Lazarraga Sarien helburu nagusia Arabako arlo sozio-ekonomikoan euskararen alde lan egin duten entitate edota pertsonak saritzea eta haien ahalegina errekonozitzea da. Hala, Lazarraga Sarien bidez, Arabako lau entitate eta pertsona bat sarituko dira euren lan ingurunean euskara txertatzeko aurrera eramandako ekimenengatik.

Informazio gehiago:

http://sustatu.com/1276853067

http://www.euskaraba.com/euskara/albisteak/lazarraga-sariak

 

EUSKARA PRAKTIKATZEKO AUKERA BASERRIETAN EHNE ETA TOPAGUNEAREN ESKUTIK

[erabili.com]

Uda honetan euskara praktikatu nahi duten mintzalagun edo berbalagunek, Bizkaian (Busturialdean eta Mungialdean) dauden 17 baserritan izango dute horretarako aukera, Topagunearen eta EHNEren eskutik. Baserritarrek giro euskaldunean murgildu eta euskaraz bizitzeko aukera eskainiko dute, baserriko lanetan laguntzearen truke.

Informazio gehiago:

http://www.erabili.com/zer_berri/berriak/1276498351

 

ALBISTEAK

EUSKARAREN ERAKUNDE PUBLIKOKO ZUZENDARI POSTUA UTZIKO DU ESTEBE EIHERABIDEK

[Berria.info]

EEPren barnean ez dela krisialdirik esan du, eta Baigorri-Garazi elkargoarentzat lan eginen duela. Etorkizunean Garazi-Baigorri elkargoarentzat egingo du lana, administrazio zerbitzuen zuzendari gisa. Herri Elkargoak onartu du Eiherabideren hautagaitza, eta urriaren 15ean hasiko du kontratua. EEPk beste zuzendari bat atzeman beharko du, eta, horretarako, deialdi publikoa egin beharko du datozen asteotan.

Informazio gehiago:

http://paperekoa.berria.info/harian/2010-07-16/015/007/eiherabidek_euskararen_erakunde_publikoko_zuzendari_kargua_utziko_du.htm

http://www.kazeta.info/euskalherria/euskararen-erakunde-publikoa-zuzendari-berri-baten-bila

 

ESPAINIAKO SENATUAK EUSKARA ERE ERABILTZEA ONARTUKO DU

[Berria.info]

PP ez beste talde denak neurriaren alde agertu dira.Espainiako Senatuak ganberan, gazteleraz gain, euskara, katalana eta galiziera ere erabili ahal izateko egitasmoa onartu du.134 senatarik egitasmoaren alde bozkatu dute, 122k aurka.

Informazio gehiago:

http://www.berria.info/albisteak/40797/espainiako_senatuan_euskara_ere_erabiltzeko_egitasmoa_onartu_dute.htm

 

EKUADORKO HIZKUNTZEN INGURUKO IKERKETAREKIN AURRERA JARRAITZEN DU GARABIDE ELKARTEAK

[garabide.org]

Helburua azken berrogeita hamar urteotako erroldetan hizkuntza indigenei eta hiztunei buruz egon daitekeen informazioa bildu, aztertu eta antolatzea da, batetik; eta bestetik hizkuntza horietako bakoitzaren azterketa sakona egitea eta mapetan erakustea. Marleen Haboud eta Olga Mayorga buru ditu ikerketa-taldeak. Lehen atal honetarako besteak beste Bizkaiko Foru Aldundiaren laguntza izan dugu eta Garabiderekin lankidetzan ari da Soziolinguistika Klusterreko Belen Uranga ikertzailea.

Informazio gehiago:

http://www.garabide.org/euskara/albisteak/ekuadorko-tsafiki-hizkuntzaren-lehen-azterketak-emaitza-kezkagarriak

 

ELKARTEETAN EUSKARAREN ERABILERA SUSTATZEKO ESKULIBURUA AURKEZTU DUTE

[erabili.com]

Elkarteetan eragiten hitzarmengintzaren bidez. Entitateak euskalduntzeko metodologiaren garapena eskuliburua aurkeztu zuen Topaguneak (...) Eskuliburu honek, era guztietako elkarteetan euskararen erabilera sustatzeko metodologia garatzen du. Euskara elkarteek 20 urtetan gizarteko eremu sozioekonomiko ezberdinetan landutako hitzarmengintza egitasmoen metodologia du oinarrian gaur aurkeztutako proposamenak eta Iñaki Eizmendik, Ebete zerbitzuetako arduradunak, herrietan diharduten era guztietako elkarteetara egokitzeko lana egin du, Topaguneko Entitateak Euskalduntzeko Saileko Piedad Dorado (Durangoko Berbaro euskara elkartea), Ainara Labado (Eibarko ...Eta Kitto! euskara elkartea), Itziar Larzabal (Irun Iruten euskara elkartea), Galder Unzalu eta Sonia Perezekin batera.

Informazio gehiago:

http://www.erabili.com/zer_berri/berriak/1277276803

http://www.topagunea.org/hitzarmengintza/elkarteetan-euskararen-erabilera-sustatzeko-metodologia-eskuliburua-aurkeztu-du-topaguneak

 

HIZNET HIZKUNTZA PLANGINTZA GRADUONDOKOAK 10 URTE; IZEN EMATEKO EPEA ZABALIK

[Zuzeu]

Hiznet Hizkuntza Plangintza ikastaroaren ibilbide luzean 400dik gora kidek parte hartu dute; euskararen normalizazioaren alde lanean ari direnak, gehienak. 2010/2011 ikasturtea izango da ikastaroaren hamargarren edizioa; azaroan hasi, eta datorren urteko uztailean amaituko da. Euskal Herriko Unibertsitateko Berezko Titulua da berau eta Hizkuntza Politika Sailburuordetzaren babesa du. Soziolinguistika Klusterra eta Udako Euskal Unibertsitatea ere ikastaroaren laguntzaile dira.Ikastaroan izena emateko epea zabalik dago.

Informazio gehiago:

http://zuzeu.com/2010/07/19/hiznet-10-urte-soziolinguistikaz/

http://hiznet.asmoz.org/

 

MINTZOLA FUNDAZIOAK DATORREN IKASTURTERAKO LAN-ILDO NAGUSIAK ETA BERE WEBGUNE BERRIA AURKEZTU DITU

[Sustatu]

Aurkezpena Villabonako Subijana etxean izan zen (Mintzolaren eta Bertsolari Elkartearen egoitza dena) eta hantxe izan ziren Josune Zabala (Mintzolako zuzendaria), Estibalitz Alkorta (Gipuzkoako Foru Aldundiko Euskara Zuzendaria) eta Asier Sarasua (webgunea egin duen Codesyntax enpresako ordezkaria). Mintzola.com ahozkotasunaren behatokiaren inguruko informazio guztia eskura jarriko duen ataria eta. 2010-2011rako egitasmoaren ildo nagusiak aurkeztu ziren prentsa-aurrekoan.

Informazio gehiago:

http://sustatu.com/1279613667

http://www.mintzola.com

 

EUROPAR UNIBERTSITATEEN ELEANIZTASUNAREN INGURUKO SAREAK WEBGUNE BERRIA AURKEZTU DU

Nazioartean bere jardunaren berri emateko tresna nagusia izango da aurrerantzean.

Informazio gehiago:

http://in3.uoc.edu/opencms_in3/opencms/webs/projectes/EUNOM/EN/

 

AGENDA

"LEGEA, HIZKUNTZA ETA ESTATU ELEANITZA" NAZIOARTEKO BILTZARRA BURUTUKO DU NAZIOARTEKO HIZKUNTZA-LEGEEN AKADEMIAK

2010eko urriaren 31tik azaroaren 4ra burutuko da biltzarra Hegoafrikako Bloemfontein hirian eta Free State Univertsitatea arduratuko da antolakuntzaz.

Informazio gehiago:

http://www.ufs.ac.za/faculties/content.php?id=6829&FCode=01&DCode=153

 

"HIZKUNTZEN IRAKASKUNTZA INGURUNE GERO ETA ELANIZTUNAGOETAN" NAZIOARTEKO BILTZARRA

Varsovian (Polonia) burutuko da irailaren 16tik 18ra. Gaiari buruzko ikerketen emaitzak ezagutarazi eta irakaspenak elkartzukatzeko gune izateko asmoz antolatu da..

Informazio gehiago:

http://www.ils.uw.edu.pl/ltime.html

 

IRITZIAK – ELKARRIZKETAK - ARTIKULUAK

ARGITALPEN GOMENDATUAK

HABE Liburutegiak eskuratu berriak


Nork: garaigoikoa.2010/09/02 20:43:17.924 GMT+2
Etiketak: klusterra soziologia hizkuntzaren 29 soziolinguistikaz sl soziolinguistika | Permalink | Erantzunak (0) | Errenferentziak: (0)

2010/09/01 21:43:57.583 GMT+2

Abuztua eta iraila: hiru kandela

Abuztua eta iraila: hiru kandela

Orain dela hiru urte

Oporrak amaitu dira aurten ere. Eta hona nator berriro mendietatik behera. Oporretan buruak ematen dizu pentsatzeko eta udako hausnarketa batekin etorri nintzen irailean orain dela hiru urte. Gogotsu eta fuerte hasteko. Baina ez zuen asko iraun, Telebilbaoren erreportajean gogoa joan zitzaidan eta errealitatea muturren aurrean, beste behin ere.

Komikizalea izan naiz beti eta komikia ekarri nuen blogera, Arrasateko faktorian egindakoa, euskaldunon jarreren gainekoa. Liburutegi bat hasi nintzen egiten, baina hor geratu da, guztiz ahaztuta eta zaharkituta. Baina tira.

Emunek antolatutako jardunaldi baten berri eman nuen gero (gauzak zer diren handik gutxira ni hasi nintzen han beharrean). Geroxeago aipatu nuen ikerketa soziolinguistiko bat Berriako portadara heldua zela. Hiznet ikastaro klasikoa ere ezin aipatu barik utzi, ezta Bat aldizkaria ere. Oraingo honetan 63. alea, eskola orduz kanpokoari buruzkoa.

Eta amaitu nuen hilabetea David Crystal eta Moreno Cabrerarekin. Hilabete gogorra iraila, bai horixe.
  1. Oporrak amaitu direz
  2. Lehentasun kontua
  3. Ganora gitxi
  4. Euskaldun zaharren jarrerak lantzeko komikiak
  5. Nire liburutegia
  6. Motibazioa eta hizkuntza normalizazioa jardunaldia
  7. Soziolinguistikaz 16. zenbakia
  8. Portadara iritsi
  9. HIZNET, Hizkuntza plangintza matrikulazio epea zabalik
  10. Irakurgaiak: Bat 63
  11. Diskurtsoa dela-eta


Orain dela bi urte

Hizkuntza politikarekin hasi nuen opor ostekoa orain dela bi urte. Eta artikulu bakarra ez,  bi. Iraileko aldatsa igotzeko onak ez dakit izan ziren. Autozentroarekin bueltaka jarraitu nuen hilabetea, eta nabaria denez, oraindik burmuinaren zati bat oporretan zegoen. Ez nebilen oso autozentratua ez.

Kontzeptua ordutik hona asko erabili da, eta azken aldion badirudi indarra hartzen ari dela, bai kulturgintzan zein bestelakoetan. Ea ba. Izen luzeko jardunaldiak etorri ziren horien ondoren eta, tira, hor utziko dugu kontua.

Maitasun kontuak aipatu nituen geroago, Malores Etxeberriaren aipu batetik tiraka. Bat 67 aldizkariaren aurkezpena ekarri nuen segidan blogera. Eta hilabetea amaitzeko Unesco Etxeak antolatutako jardunaldi batzuk.
  1. Oporren ostean hizkuntza politika  
  2. Oporren ostean hizkuntza politika (eta 2)
  3. Autozentroaren zentroa
  4. Ez nabil oso autozentratua
  5. Gutxiengo Hizkuntzen Erabilera Gazterian Sustatzeko Gauzatutako Eskarmentu Arrakastatsu eta Praktika Egokien Biltzarra
  6. Erabiltzeko maitatu
  7. Bat 67: Erramun Baxok-en omenez
  8. Hizkuntza gutxituen erronkak globalizazio aroan


Orain dela urtebete

Udan irakurtzeak zer garrantzia duen azpimarratu nuen abuztuan (pedantea naiz gero batzuetan): udako oporretan pilatutako hainbat artikulu ziren irakurri beharrekoak. Arnasguneak etorri ziren gero (blog honetara hainbatetan bezala). Batetik Zerain eta bestetik Zalbideren aipua (beste klasiko bat hemen).

Irailean geundela gogorarazi nuen jarraian. Badaezpada ere. Gaztelania ohetik bota duten bikoteak etorri ziren hurrena nire blogera. Geroxeago ere etorriko ziren, bai horixe. Soziolinguistikaren domestikoaren sortaren lehen alea ekarri nuen blogera segituan. Eta, hilabetea amaitzeko, artikulu polemikoa, euskaraz egin nahi ez duten euskaldunei buruzkoa.

1.  Udan be leidu bida
2.  ZerAIN DEZAGUN
3.  Arnasa lasai hartzeko guneak
4.  Irailean gaude .... ezta?
5.  Gaztelania ohetik bota duten bikoteak
6.  Mintzatzen hasteko gomendioak
7.  Egin nahi ez dutenak

Nork: garaigoikoa.2010/09/01 21:43:57.583 GMT+2
Etiketak: abuztua soziologia hizkuntzaren iraila hiru sl soziolinguistika kandela | Permalink | Erantzunak (0) | Errenferentziak: (1)

2010/07/22 19:24:21.103 GMT+2

Ziaboga hartuta

Orain dela gutxi, Topaguneak aurkeztu du liburu bat, Entitateak euskalduntzeko liburu bat.

Gainetik irakurri dut, baina berritasun nabarmen bat topatu dut liburuan. Orain arte, elkarteak edo merkatariak edo enpresak euskalduntzera jo dugu, euren jarduna euskaraz egitera bultzatu ditugu.

Oraingo honetan hori ere proposatzen da. Baina norantza aldatzea ere proposatzen da, ziaboga hartzea. Elkarte batzuk euskalduntzea bai, baina elkarte batzuk euskararen aldeko eragile bihurtzea inportanteagoa omen da, euskaldundu ala ez. Ala euskaldundu ostean.

Berria da hori. Elkarteekin baino ez da proposatzen baina berria da.

Nork: garaigoikoa.2010/07/22 19:24:21.103 GMT+2
Etiketak: soziologia hizkuntzaren euskaldundu entitateak topagunea sl elkarteak soziolinguistika | Permalink | Erantzunak (0) | Errenferentziak: (1)

2010/07/20 22:00:27.678 GMT+2

Galegoak laboratorioan

Galiziatik dator notizia ostera ere. Oraingoan galego lab izeneko webgunea, galego lab izeneko ideia zaparrada.

Eta zer da ba? Euren berbetan, galegoaren aldeko ekintza zehatzak garatzeko sare soziala, behetik gora, batez ere kultura berrietan eta egunerokotasuneko kontuetan.



Eta zelan funtzionatzen du? Ba, zeuk ideia botatzen duzu eta gero beste hainbat kideren artean ideia hori garatzen da, ideia hori borobiltzen, ideia hori txukuntzen eta martxan jarri. Ideia laborategia, ideiak lankidetzan.

Eta ze ideiak daude? Ba, garatu gabekoen artean, adibidez galizieraz film pornoak grabatzeko ideia, galizieraz mundutik bidaiatzeko ideia,  galego express zerbitzua eta abar. Oraindik guztiz garatutako ideiarik ez dute, baina maiatzean jarri zuten martxan eta goiztxo da.

Nork: garaigoikoa.2010/07/20 22:00:27.678 GMT+2
Etiketak: soziologia hizkuntzaren galizia lab galegolab sl soziolinguistika laboratorioa | Permalink | Erantzunak (0) | Errenferentziak: (0)

2010/07/13 22:07:44.254 GMT+2

Irabazi ala galdu?

Inkesta soziolinguistikoa aspaldi eman zuten argitara. Eta haren gaineko irakurketa gehienak oso positiboak izan ziren. Euskaldunak gero eta gehiago gara, gero eta gehiago. Eta hori poztekoa da. Dena den, antza gakoa erabileran dago.
 
Inkestak aztertu ostean, eta 25 urteko ikuspegiarekin, bai, arrazoia. Irabazi egin dugu, asko gainera. Baina hori horrela al da?
 
EAEri dagokionez, erdaldundutako herrietan irabaziak garbiak izan dira, garbi-garbiak. 1981. urtean euskaldunak %50 baino gutxiago ziren herri guztietan euskarak irabazi egin du, guzti-guztietan.
 
Baina 1981an %50 baino gehiago ziren herrietan zer gertatu da? Ba herri askotan galerak izan dira, herri askotan. 2006an euskaldunen kopuru erlatiboa jaitsi da 84 herritan, Bizkaian eta Gipuzkoan (Nafarroako eta Ipar Euskal Herriko daturik hobeto ez eman). Eta hango eskualde euskaldunenetan: adibidez, Tolosaldean 20 herritan, Busturialdean 15 herritan, Lea-Artibain 10 herritan, Goierrin 9 herritan edo Uribe Butroen 8 herritan.

Herri horiek guztiak txikiak dira, gehienak 1000 biztanletik beherakoak, baina badaude herri koskorrak ere horien artean: Aia, Bakio, Dima, Elgeta, Gatika, Getaria, Lezama, Muxika, Soraluze edo Orozko adibidez. Eskualde horietako herri handietan ez da galerarik izan (Tolosan, Ibarran, Gernikan, Bermeon, Lekeition, Ondarroan, Beasainen, Ordizian, Lazkaon edo Mungian), baina herri txikietan bai. Eta, gainera, herri txiki horietako askotan populazioa ere jaitsi da 25 urtetan.

Mila aldiz egiten dugu berba euskararen herriak sustatzeaz eta indartzeaz, ekimenak ere bideratu ditugu, baina atzeko atetik galtzen ari gara ... Asko aurreratu dugu, baina akaso oinarrian huts egiten ari gara, ezta?

Nork: garaigoikoa.2010/07/13 22:07:44.254 GMT+2
Etiketak: soziologia hizkuntzaren uema arnasguneak inkesta sl soziolinguistika | Permalink | Erantzunak (3) | Errenferentziak: (1)

2010/07/06 20:23:57.724 GMT+2

Magia da ala maitasuna?

Mutil batek neska-lagun euskalduna ezagutu eta, zuzenean, euskara aktibatzen da. Magia bidez edo. Maitasunaren misterioak…Martin Rezola Tirakan

Edo hori dio behin behin Lourdes Auzmendik. Izan ere, mutil koitauok badakigu zer egin behar dugun hizkuntza ohiturak aldatzeko. Neska euskaldun batekin ligatu eta berehala aktibatuko zaigu barruan ugertuta daukagun euskara.

Ez dakit orduan zertarako egiten diren hainbeste ikerketa, hainbeste lan eta hainbeste ekimen hizkuntza ohiturak aldatzeko. Automatikoa da, neska euskalduna topatu eta euskaraz egin, dena bat.

Hori bai, gu mutilok ez dugu ezer egin behar. Euskaldunak bagara ere, guk ez dugu ezer aktibatzen, guk ez dugu ezertarako ere balio. Joder, nik diru-laguntzak kenduko nizkieke atoan euskara ikasten ari diren ar guztiei. Eta denak bideratu euskara ikasten ari diren emeei, horiek dira eta garrantzitsuenak.

No comment .....

Nork: garaigoikoa.2010/07/06 20:23:57.724 GMT+2
Etiketak: soziologia hizkuntzaren transmisioa hizkuntza sl soziolinguistika erabilera ohiturak | Permalink | Erantzunak (0) | Errenferentziak: (1)

2010/07/05 21:28:42.776 GMT+2

Euskarari lotzeko balio sorta zaharberritzen

Orain hilabete batzuk esan nuen jarraituko nuela Juan Inazio Hartsuagaren liburuarekin. Eta esandakoa bete dut, Lantalanen bada ere. Baina bueno, oraingoan ere hona ekarriko dut.

Juan Inazio Hartsuagak honako liburua idatzi du orain dela gutxi: Euskararen egoerari irizten. Hango kapitulu baten izenburua da artikulu honen testua, eta kapitulu horren laburpena da artikulua.

Zer nolako ezaugarriak izan beharko lituzkete sorta horretan sartu beharreko balio eta ereduok?

  • Irekitasuna, zabaltasuna: ahalik eta jende gehienaren identifikazioa errazteko.
  • Abegikortasuna: euskararen etxetik inor kanpoan ez dela geratzen erakusteko modukoa.
  • Protagonismo banatzailea izatea: gizarteko gizabanako eta talde guztien protagonismoa eta ardura azpimarratuko duena.
  • Atzera baino, aurrera begiratzen duena izatea, atzean ez baitugu behar dugun moduko eredu soberarik.
  • Baikortasuna.
  • Benetakotasuna, errealitateari begirunea izatea, mitoetatik urruntzea.

Ezaugarri horietan oinarriturik, honatx hainbat proposamen zehatz:

  • Kito arbasoekin. Hitz egin dezagun eteten ez den kateaz. Kanpotik etorritakoak ezin ditu hemengo arbasoak izan. Areago, hemengo arbasoen kontu horrek ez du batera laguntzen haren euskararekiko identifikazioa sendotzen. Baina eteten ez den katearen maila garrantzitsua izan daiteke zorioneko arbasoak bezalaxe eta arbasoon oinordekoak bezalaxe. Edo kate maila garrantzitsuago seguru asko oinordekoek azken honetan egiten duten ume kopuruari erreparatuz gero.
  • Kito hizkuntza zaharrenaren kontuarekin. Ekaingo ehiztariek proto-euskaraz zihardutenean gainerako gizakiak ez ziren mutu. Garai hartako gizaki guztiek hitz egiten zuten. Eta gaur hitz egiten diren hizkuntza guztiak garai hartako hizkuntza batetik edo bestetik etorriak dira, eta ez geroztik asmatutakoak. Euskararen meritua ez da besteak baino zaharrago izatea (...). Euskara iraupen adibide paregabea da. Aspaldian Eurasian zabaldu eta nagusitu zen hizkuntza familia bateko oinordeko bakarra Europan. Hizkuntza indoeuropar hedazaleek inguraturik ia 3000 urtez bizirik irautea asmatu duen tradizio militar edo hedazalerik gabeko herri baten hizkuntza. (...)
  • Baserriko eredua gainetik kendu ezinik gabiltza eta hori hizkuntza politikaren porrotaren adibide garbia da. 2009an Peru Abarka eta Maisu Juanen arabera gabiltza oraindik. Tolosako ikastolan umeren batek euskara egoki eta bizi erabiltzen duenean casherito deitzen diote (...)

Dinamika ezkor honek baditu bere salbuespenak halere. Urriak eta mugatuak beharbada, baina bide erakusle izateko behar adina nabarmenak:

  • Surfaren mundua, zeharo berria, tradiziotik jaregindakoa eta euskararen ohiko girotik kanpokoa izan arren, euskalduna da gehien bat, euskarak bereganatu du.
  • Enpresa mundua: garai bateko enpresari euskalduna ezinbesteko euskaldunaren eredu zen, batere euskaltzaletasunik gabekoa. Gaur egun, enpresa munduari buruzko erreportaje eta albisteetan ohikoa bihurtu da hizkera egoki eta dotorez mintzatzen diren zuzendari, teknikari eta ikertzaileak entzutea.
  • Bertsolaritza: aurreko tradizioarekiko arbuiorik gabeko etena burutu du. Goitik behera zaharberritu da: gaiak, doinuak, neurriak, bertsolariak eta bertsozaleak. Amets bat litzateke ideologikoki gehiago zabaltzea, baina hori, bertan dagoenarena baino, bertan ez dagoenaren ardura da, daudenek eta ez daudenek biek lagundu beharko badute ere.
  • Ikastolak: modernotasun eta bikaintasun eredu bilakatu dira alor askotan. Euren jatorrizko helburua euskara eta euskal kultura suspertzea dela era dinamikoan ulertu dute eta hainbat arlotan hezkuntza sistemaren buru jarri dira, hala nola, kalitatearen kudeaketa, ingelesaren irakaskuntza, etab.

Izango dira aipatu gabe uzten ditudan salbuespen gehiago ere. Barka biezadate ahaztutakoek. (...)

Euskaltzaletasuna euskararen gainbeheraren pertzepzioarekin garatzen da gehienbat. Horregatik erreferente ugarienak XIX. mendetik egundainokoak eta kutsu ideologiko eta politikoz beterikoak dira. Beste eredu batzuk indartu behar ditugu. Gaur egungoak batik bat (...) Eredu berriak behar ditugu, euskaltzaletasun natural bezain militantekoak. Militantzia apal eta irribarretsu bezain tinkokoak. (...)

Zaindu dezagun euskararen estatusa. Azken 30 urteotan zalantzarik gabe huts gehien egin den alorra. Duela 40 urte euskarak ez zuen ia ezer. Izen ona eta prestigioa besterik ez. Gaur egun ia dena du, baina bere estatusak okerrera egin duela esango nuke. (...)


Nork: garaigoikoa.2010/07/05 21:28:42.776 GMT+2
Etiketak: euskara balioak soziologia hizkuntzaren juan hartsuaga inazio sl soziolinguistika | Permalink | Erantzunak (0) | Errenferentziak: (1)

2010/07/01 21:29:51.681 GMT+2

Uztaila: hiru kandela

Orain dela hiru urte:

Uztaila behar den moduan, tabernetan hasi nuen orain dela hiru urte. Filosofatzen tabernetan. Uztaila ere beroarekin lotzen dugu. Eta orain dela hiru urte, hor ibili ginen soziolinguistikaren gida sexualarekin gora eta behera. Hilabetea jarraitu nuen Xirika gazte aldizkarirako idatzitako artikulu batekin. (Gero soka ekarri zuena).

Uztaila ere ikastaroen hilabetea da. Eta orain dela hiru urte hiru ekarri nituen blogera: UEUk antolatutako bi (Euskararen balio-merkatua eta Hizkuntza plangintzak: teoriak eta aplikazioak) eta Hik hasik antolatutako bat (Bigarren hizkuntzaren irakaskuntzaren gainekoa).

Baina uztaila ere hilabete ona da irakurtzeko. Eta kolonialismoari buruzko liburua irakurri nuen eta blogera ekarri iruzkina. Eta, azkenik, The case of basque: past, present and future liburua ere irakurri nuen eta blogera ekarri. Eta horrela zarratu nituen ateak irailera arte.

  1. Tabernetako filosofia 
  2. Soziolinguistikaren gida sexuala
  3. Normalizaziorako alderdi linguistikoak bigarren mailakoak dira 
  4. Eskolan, ikasgelaren barruan zer gertatzen den ikertu behar dugu
  5. Irakurgaiak: Lingüística y colonialismo
  6. Saltzen, saltzen ....
  7. Saltzen, saltzen .... (II)
  8. Hizkuntza plangintzak: teoriak eta aplikazioak (I)
  9. Hizkuntza plangintzak: teoriak eta aplikazioak (II)
  10. Hizkuntza plangintzak: teoriak eta aplikazioak (III)
  11. Soziolinguistikaren gida sexuala (Ahoa bete sexu)
  12. The case of basque: past, present and future
  13. Zarratuta


Orain dela bi urte:

Hilabetea hasi nuen inkesta soziolinguistikoen gaineko kritika batekin. Artikulu zahar batekin. Gero etorri zen dekretazoa. Orain dela gutxi, Patxi Lopezek bertan behera utzi ei ditu dekretoak aurreikusten ez zituen isunak. Ulertezina, baina horrela da.

Eta amaitu Zalbiderekin, Mikel Zalbiderekin. Eta berak egindako txosten batetik ateratako artikuluekin. Aipatu behar da hiru artikulu hauek, hirurek, erantzunak izan dituztela, ez oso gauza ohikoa Garaigoikoan.

  1. Inkestatik inkestara 
  2. Dekretazoa
  3. Leidu Zalbidek zer dioen


Orain dela urtebete:

Hilabetea hasi nuen udaltop-eko materialekin (aurten arinago igo dituzte, artikulu batean igoko dut hurrengo astean). Baserria ez galtzea aholkatzen digu Fishmanek, eta horren harira artikulu bat ekarri nuen, Karmele Rotaetxerena. Interesgarria artikulua eta sortu zuen eztabaidatxoa.

Gurasoei begirako webgune batekin jarraitu nuen. Webgunea interesgarria da, nahiz eta hizkuntzaren kontua larregi ez aipatu (momentuz behintzat, iaztik hona kolaborazio artikulu bakar bat). Urdiaingo bizilagun batzuen testigantzekin jarraitu nuen, euskararen historia sozial txiki baterako ekarpen egokiak izan daitezkeenak.

Matematiken mundu miresgarrira egin nuen salto kikunberan. Soziolinguistikaren matematiketara Gorka Azkarateren eskutik. Eta hilabetea amaitu nuen Bat aldizkariaren 70. zenbakiarekin.

  1. Udaltop jardunaldien materialak eskura
  2. Baserria ez galdu
  3. Guraso.com
  4. Urdiaingoak
  5. Matematikak eta elebidunak
  6. Bat 70

Nork: garaigoikoa.2010/07/01 21:29:51.681 GMT+2
Etiketak: kandela soziologia hizkuntzaren hiru uztaila sl soziolinguistika | Permalink | Erantzunak (0) | Errenferentziak: (1)

2010/06/24 08:42:27.819 GMT+2

The basque experience: some keys to language and identity recovery

Garabide elkarteak euskararen berreskuratze prozesuari buruzko lehen lana plazaratu du. Lan dibulgatiboa da, guztiz, oso interesgarria, eta gainera euskaraz, gaztelaniaz, frantsesez eta ingelesez.

Bikaina benetan. Horrelako gehiago behar ditugu. Dokumentala ere plazaratu du. Zabaldu beharko da hauen lana nazioartean, ezta?

(Gainera, lizentzia librea du liburuak).


Nork: garaigoikoa.2010/06/24 08:42:27.819 GMT+2
Etiketak: garabide sociology soziologia language hizkuntzaren sociolinguistic sl soziolinguistika | Permalink | Erantzunak (0) | Errenferentziak: (0)