Baga, biga, bloga!

Jozulin Martera doa, Galdakaotik Galdakaora. Eta ez da txantxa. Berriki jakin dugu ura gaur egun isuri dela Marten eta orain ardoa edo garagardoa bertaratzea izango da erronka. Marten sekulako ilunsentiak ikusteko aukera izango dut eta bidean noala agian utziko didate geldialdi bat egin eta osteratxua egitera irteten.

Behin hara helduta, lehen lana gaztetako irakurketetan amestutako parajeetan zehar ibiliko nintzateke: Valles Marineris, Port Lowell, Schiaparelli... Olympus Mons-en gainetik egingo nuke hegalditxo bat...

Baina ez nuke bakarrik egon nahi. Ez zarete animatzen? Pentsa, planeta oso bat guretzat... planeta gorri bat gainera. Espediziokide eta Marteko Galdakoztar izan nahi baduzue, otsailaren 1era arte hemen duzue aukera izena emateko. Ez dizue inork inoiz martziano deitu? Orain duzue benetako martzianoa izateko aukera! Martziano galdakoztarra, hori bai.

Bai, badakit, aurreko loturan klikatu baduzu ohartuko zinen txantxaz, ez gara gu benetan joango, gure izena joango da Martera beste milaka batzuekin batera DVD batean. Kontua da ez nekiela neure buruari zer oparitu urtebetetzean (urtarrilaren 5ean, lagun baten egun berean) eta Internetetik saltseatzen nenbilela aurkitu nuen Jozulinen izena Martera bialtzeko aukera eta, klaro, opari politagorik! 
Zuek ez zenuten astronauta izan nahi txikitan, ala?