G&A (Gauez eta Azpikeriaz)

Hiri handiak horrelakoak dira. Azkar ibili beharra dago, bestela atzekoek zapalduko zaituzte/metroa galduko duzu/gorri jarriko zaizu semaforoa. Oztopoz beterik daude kaleak gainera eta horiek saihestuz ibili beharra dago, paseoa asko zailduz: eskaleak, prostitutak, mapari begira espaloiaren erdian gelditu diren turista taldeak, propaganda banatzen duten gizon eta emakumeak… Azken hauei kariño espeziala diet eta beti hartzen dut eskaintzen didaten papertxoa – Descuentos en Peluquería Manoli, Hágase Azafata de Congresos, MacBurguer prezio erdian eta abar…

Bada gaur gizon beltz handi bati papertxo horietako bat hartu diot - txikitxoa zen, txuria, ez oso deigarria. Poltsikoan sartu dut, begiratu ere egin gabe, eta behin etxean nengoela, papertxoa zakarrontzira botatzeko asmoarekin, azkenean begirada bat bota diot. Zera zioen paperak:

Profesor Karat
Gran ilustre vidente mágico africano con rapidez, eficacia, garantía y discreción el maestro chaman africano Karat te ayuda a resolver todo tipo de problemas matrimoniales, recuperar pareja, negocios, suerte, salud, enfermedades, divorcios, amarres, impotencia sexual, exámenes. Resultado inmediato y 100% eficaces.

Eta pentsatu dut: ze gauza arraroak gertatzen diren hiri honetan, eta ia ez gara konturatzen, beti presaka gabiltzalako.
Eta gero pentsatu dut ere: gida-baimenerako azterketaren bezperan larri ikusten badut nire burua badakit nor deituko dudan.