The Indezents bloga >>

Batzuetan burura aspaldiko oroitzapenak etortzen zaizkigu eta askotan ez dugu ulertzen zergaitik demontre gogoratu garen egun, abesti, pertsona edo hots horretaz. Atzo oroitzapen reziklatu hauetako batekin egin nuen topo nire asperkerian eta egia esan, barre batzuk bota nituen oroitzapenaren kontura. Atzo Bittor Aiape handiaz oroitu nintzen.

Gogoratuko zarete ziuraski 12-13 bat urteko ume kitarjole honetaz. Bere Hitik handiena 1992ko Nafarroa Onezinerako egin zuen kantua izan zen eta egia esan, kantu honetaz besterik ez naiz oroitzen. Lingua vascorum, lingua navarrorum, ze arraroa euskararik gabe, Nafarroa! Salto batzuk egin genituen garai hartan kantu honekin eta zerbait egingo zuen ongi mutilak, hau baita oroitzen dudan Nafarroa Oinezeko kantu bakarra. Kontua da, gure Bittor Aiape haur prodigioa Euskal Herriko historiaren misterio handienetako batean bihurtu dela (ia Herri Torrontegiren mailara iritsi arte). Non sartu da? Non dago? Joselitoren moduan droga munduan murgildu eta ez da inoiz gehiago hazi? Edo Takolo bezala desintoxikazio programa batean sartu da?

Ez da gizalegezkoa izaten erantzunik izan gabe galderak botatzea eta gaurkoan badut erantzuna (lehengo aldia izango da beraz, entzun). Interneten bila eta bila ibili ondoren tipoa dantzari klasikoa dela jakin ahal izan dut. Musikarekin batera, bere griña nagusia dantza omen zen eta bere burua trebeago ikusten omen zuen dantzarako kanturako baino. Izorrai! Bittor Aiape Billy Elliot da!

Youtube eta googlen ibili naiz Nafarroa Oinez 92 hartako bideokliparen bila baina ez dut aurkitu. 50 segundutako bideo hau besterik ezin izan dut aurkitu. Hala ere, nahikoa izango da zuek ere tipoaz oroitzeko.