Baga, biga, bloga!

Nahikarik pasatu zidan eta ezetz esaten ez dakidanez –badakizue- hor doa:

Eta eragin nahi dut, ala? Bai, bestela ez nuke idatziko; ez nituzke begitantziño hauek haizatuko.

Norengan? Zenbatengan? Nahita ez daukat counter-ik; ez daukat modurik jaikiteko zenbat zareten hemendik zabiltzatenak, zenbat denbora ematen duzuen berton... Datu objektibo bi dauzkat: Bloglineseko kuadrillatxoa 27koa da; beraz, hogeitazazpi irakurle. Egongo dira aurki-tik datozenak, lagunen bat ere bai... Pozik irakurle taldetxoarekin, hasi nintzenean amestu ere ez nuena. Bigarren datu objetiboa zera da: idatzi dudan mezurik ganorabakoenak izan zuen arrakasta. Esan bezala, ez daukat bisita zenbatzailerik, baina castpost-ek bai, edo bazeukan ondo ibiltzen zen garaian... Kontua da “Attá inbiu txabolá” audio artxiboak 722 zabaltze zeuzkala counter-ak funtzionatzeari utzi zionean. Nire ezjakintasunetik ikaragarrizko kopurutzat daukat mezu batek zazpiehun bisita izatea, ez baitakit zer den “kopuru normala” euskal blogosferan.

Azken honek hasierako galderara garamatza: Eragin al dut nik inorengan? Tira, barrea eragin badiot, ez dago gaizki, horrexetarako idatzita baitzegoen mezua. Baina, ez dizuet ukatuko nolabaiteko jelosia badudala mezu arrakastatsu horrekiko, aseago utzi nindutela idatzitako beste mezu batzuek, ez hain ganorabakoak. Zer egingo diogu.

Eta topikoetan jausteko batere gogo barik esan nahi dut amaitzeko barru-barrutik eskertzen diodala hemen pausatzen den lagun bakoitzari begitantziño hauek irakurtzea. Eta erantzutea, ze, nik ez dakit inorengan eragin dudan, baina erantzun batzuek nigan eragina izan dute, duda barik.

Buf! Eta mezu hau ere blogei buruz... Bagara apur bat karganteak blogariok, ezta?

Marroi hau Patxi, Patxi eta Leireri pasatzen diet, ezetz esateko eskubide guztiarekin.