ORO ERRANA DA?

Emakumeak gutxiengoa direla argi eta garbi dago.

Idaztea beti izan da jakitunen kontua, horregatik historian zehar gizonak izan dira nagusi literaturan. Diktadura amaitu ondoren, emakumeak idazle hasi ziren eta literaturak zatiketa edo maila desberdinak izan zituen. Zeintzuk izango ziren bigarren maila osatzen zuten idazleak? Emakumeak, bai noski.

 

Mascculino= universal= bueno

Femenino=  particular= malo

Nire istorio kuttuna dun. Gerra piztear dela, nonbait, itsasertzeko herri batean, ama bat negar batean ari da bere lurretako mugak zedarritzen dituen egurrezko hesiaren alboan. Petatea lepoan hartuta, gerra itsasontzi batean ontziratzera doan marinel bat inguratu zaio orduan, zer gertatzen zaion galdezka. «Gerra piztear da eta pizten bada, nire semea, nire seme bakarra, gudarako sasoian eta edadean dagoena, gudara joateko deituko dute. Eta hil egingo da». Marinelari pena ematen dio emakumea hain lur jota ikusteak eta animatzen saiatzen da. «Baina emakumea, lasai egotea daukazu. Gehiegi kezkatzen zara. Ez du merezi zure burua hainbeste estutzea. Utzi gero negar egiteari. Ikustagun: gerra piztear deneko hori ikusteko dago. Bi gauza gerta daitezke oraindik: gerra piztea edo ez piztea. Gerra pizten ez bada ez duzu zertan kezkaturik, eta pizten bada ere ez. Izan ere, gerra pizten bada beste bi gauza gerta baitaitezke: zure semea armadara deitzea edo ez deitzea. Deitzen ez badute, egon lasai, ez da-eta ezer gertatzen. Eta deitzen badute ere ez, ezen eta bi gauza gerta baitaitezke: frontera destinatzea edo administrazio lanetara destinatzea. Bulego batera destinatzen badute ez dago zertan kezkaturik, eta frontera destinatzen badute ere ez. Zeren bi gauza gerta baitaitezke: lehen lerroan borrokatu behar izatea edo atzeko babes lerroetan borrokatu behar izatea. Atzeko babes lerroetan borrokatu behar izatea egokitzen bazaio ez dago arriskurik, eta lehen lerroetan borrokatu behar izanda ere ez, zeren eta kasu honetan, bi gauza gerta baitaitezke: zure semea etsaiak zauritzea edo ez zauritzea. Zure semea etsaiak zauritzen ez badu ez dago arazorik, eta zauritzen badu ere ez, zeren eta beste bi gauza gerta baitaitezke: zure semea hiltzea edo bizirik ateratzea. Bizirik ateratzen bada ez dago zertan negar eginik, eta hiltzen bada ere ez. Ezen eta bi gauza gerta baitakizkioke zure semeari hiltzen bada: zerura joatea edo infernura joatea. Zure semea zerura joaten bada, andre maitea, harro egon zaitezke, eta ez dago negar egiteko arrazoirik, kontrakoa baizik. Pozik egon beharko zenuke. Eta infernura joaten bada ere ez dago triste egoteko arrazoirik, ezen eta, ze seme eskas da hori, zerua merezi ez eta infernua merezi duena. Infernua zain duen seme batek ez du beragatik malko bat bera ere isurtzerik merezi, andre maitea!». Ez al dun ona?

(Harkaitz Cano)

Erakutsi zure atxikimendua korrika 15en manifestuari. KLIKATU HEMEN

Muestra tu adhesión al manifiesto de korrika 15. KLIKATU HEMEN
:: Korrika 15en manifestua ::Dagoeneko jakingo duzunez, korrika 15ek euskal emakumea omenduko du, euskal emakumeak gure hizkuntzaren transmisioan izan duen garrantzia eta ezinbesteko papera goraipatu nahi dituelako. Beraz, urtetako menderakuntza, jazartze eta zigorrei aurre egiteko eta euskal kultura eta euskara, belaunaldiz belaunaldi, gorde eta transmititzeko, euskal emakumeek izan duten indarra, adorea eta balioa omendu nahi ditu korrika 15ek.

Hori dela eta, korrika 15ek honekin batera doakizun manifestua idatzi du, euskal emakumeek omenaldi honi euren atxikimendua adierazteko aukera izan dezaten. Izan ere, korrika 15ek milaka sinadura jaso nahi ditu, garai ezberdin eta zailetan gure hizkuntza etxean gorde, atxiki eta ahoz aho iraunarazi duten emakume ezagun zein ezezagunen lana aitortzeko eta etorkizunean haien lanari eusteko konpromisoa hartzen dugula adierazteko.

Horregatik jotzen dugu zuregana, hain zuzen ere, zeure sinadurarekin atxikimendua adierazteaz gain, zeure inguruan ekimen honen berri ahalik eta gehien zabal dezazun eskatzeko. Euskarak aurrera egingo badu, gaur egungo emakumeoi dagokigulako lekukoa hartzea, geure hizkuntzaren berreskurapena eta iraupena bermatzeko.

Erakutsi zure atxikimendua korrika 15en manifestuari

Sinatzaileen zerrenda osoa ikusi.

 

Bizitzak zikloak ditu. Guk geuk ere, gizartearen (jendartearen) parte garen neurrian, zikloak izan ohi ditugu. Maiz ekiten diogu proiektu bati edo beste bati. Ikaragarrizko ilusio eta gogoekin ekiten diegu hasieran. Proiektuok garai bateko egoera islatzen dute, une jakin batean norbanakoak izan dituen ilusioei erantzun nahian. Horrelako une ugari izan ditut zorionez nire bizitza laburrean zehar.

Nire azken proiektuan web 2.0-k eman didanarengatik murgildu nintzen hein handi batean. Horrek nire bloga 2. mailan utzarazi dit baina tira… beste blog batetik zorionez begiratzen diot honi ere, hemendik 2 hilabetera berriro nire blog pertsonalari eutsiko diodan itxaropenez.

Polita da gustuko gauzetan aritzea bai, eta bizitzan gustuko ez diren gauza asko egin behar izaten badira ere, ez inoiz etsi, begira ezazue aurrera eta argi izan bizitzak beste norabide bat hartuko duela, zuek hala desio baduzue behinik behin.

El Pais egunkarian argitaratutako artikulu baten berri ematera natorkizue. Bertan (matxismo puntu batekin) web 2.0.-n erabilitako programei buruzko azalpen txiki batzuk irakurtzeko aukera izan dut. Hala ere, ez dira azalpen sakonak izan oro har, hauen arrakastari buruzkoak baino. Harrigarriena, sortzaile hauei guztiei aurpegia jarri ahal izatea izan da. Hain dira gazteak… Beno, batzuk bizitzan zerbait ona egin eta bizitza guztirako beharrak asetzen dituzte, eta hauek guztiak horren adierazle direla iruditzen zait. Bertako zenbait ideia aipatuko ditut jarraian, ni erabat ados nagoen kontuak hain zuzen ere. Orrialde hauen arrakastatsuak dira erabiltzaileek beren burua hauekin oso lotuta ikusten baitute. Ziurrenik hori izango da arrazoia. Nik ezingo nuke hau ezerezetik sortu nahikoa informaziorik ez dudalako baina behin irakurrita… Bezeroaren eta enpresaren arteko harremana aldatu da. Iada ez da norabide bakarrekoa, bi norabideetakoa baizik. Garrantzitsua da erabiltzailearen ahotsa entzuna izan dadin eta hemendik aurrera sortzen diren zerbitzu berrietan argi izan beharko dute hori. Horrekin, ez diot internet munduari bakarrik erreferentzia egin nahi, gaur egun hori baino askoz zabalduago egon beharko bailitzateke.

Kaixo!

Edurne eta Nerea, gusturo aritu ginen elkarlanean e?

Beno ba, ezagunen ez genunontzat oso interesgarria. Ea etorkizunean etekina ateratzen diogun.

Jarraian, bertan idatzitakoa atxikiko dut:

Nerea eta Miryan, kaixo: bihar edo etzi hitz egingo dugu, baina ekipo ederra osatzen dugu Web 2.0ren azalpenerako, ezta? nik badut ideia bat, baina garatu egin beharko nuke apur bat zuei azaldu baino lehen. Dena den, datorren astean filo ostean-edo, hitz egin beharko genuke pixka bat dena azkeneko asterako ez uzteko, ez? Ala, ondo lo egin, pareja!
Edurne
Kaixo Edurne: beno ba, ikusten duzunez jacker berria zaitugu. Ederki iritsi zait zuk bidalitakoa. Egia esan, talde lanetarako ez da batere ideia txarra hau erabiltzea e? beno, ba geroarte!

Miryan

Nerea: bale ba orduen filo ta gero eingogu berba, ia asko ikesten zuen

Nire gustuak ezagunak ez badituzue ere, gaur gerturatzen joango zarete. Gaurko honetan, odeo erabilita podcast bat blogean txertatuko dut. Euskal poeta, idazle, hizlari bikaina aukeratu dut: Esteban Urkiaga Lauaxeta, XX. mende hasierako euskaltzale porrokatua.

            Guda garaian, dena utzi eta euskal Gudarostean sartu zen. 1937ko apirilaren 26an junker alemaniairrek Gernika bonbardatu zuten. Hilaren 29an nazionalek Lauaxeta atxilotu eta Gasteizko espetxera eraman zuten . Heriotza zigorra ezarri zioten eta, ekainaren 25ean, fusilatu egin zuten (Sadam Husseinek baino heriotza zigor duinagoa izan zuen behintzat).

            2005ean 100 utte bete ziren Lauaxeta jaio zirela eta omenaldi txit polita egin zitzaion, Ehungarrenean hamaika diskoarekin. Bertako abesti bat txertatuko dut gaurkoan podcast-ean, mendigoixalearena hain zuzen ere. Abesti hau ken zazpi taldeak ezagutarazi zuen. Ken zazpi taldea eta honen abestien hitzak gustuko ez izan arren, lan bikaina egin zuten gazteei garai bateko euskal sentimendua gerturatuz.

            Amaitzeko, Lauaxetaren poema batekin utziko zaituztet, Lauaxeta pixka bat hobe ezagutzeko aukera izango duzuelakoan. Egia esan, zaila izan da poema bakarra aukeratzea baina antologikoa den poema bat idaztea erabaki dut. Gustukoa izango duzuelakoan… ongi pasa!

 

powered by ODEO

LANGILLE ERAILDU BATI

¡Ene Bizkai'ko miatze gorri
zauri zarae mendi ezian!
Aurpegi balzdun miatzarijoi
ator pikotxa lepo-ganian.
Lepo-ganian pikotx zorrotza
eguzki-diz-diz ta mendiz bera.
Ator bideskaz, —goxa sorbaldan—,
kezko zeruba yaukon olera.
Opor-otsa dok txaide zabalan,
—ukabil sendo, soñanzki urdin—.
Jaubiak, barriz, nasai etzunda,
laguntzat auke, i, urrutizkin.
Aurpegi balzdun miatzarijoi
ari bittartez deyak yabiltzak.
¡Bideskan zelan dirdir-yagijek
txapel-okerren kapela baltzak!
¡Orreik yaukoen gaizkin-itxura
sispa luziak lepo-ganian!
¡Ene Bizkai'ko miatze gorri,
zauri zarae mendi ezian!

Mendiz bera lau txapel-okerrez
aurpegi balzdun miatzarija.
Begi baltz orreik sastakai dozak
baña zatittu ezin esija.
¿Noruntz aroe esku-lotuta
burni margodun gorputz gogorroi?
¡Sendua ba'intz, etsai-odolez
bustiko eunkek pikotx zorrotzoi!
¡Nerbion-ertzok, —tranbi-dardara—,
azkatu-nayez, zenbat alegin!
Baña olaen zarata-artian
aren ayotsik adittu-ezin!
Sispa luziak sutan yagozak,
—opor-zaratak txaide zabalan—.
¡Aurpegi balzdun miatzarijoi
igeri adi eure odolan...!
Txapel-okerrak edango yabek
ardao onena Gomez-etxian.
¡Ene Bizkai'ko miatze gorri,
zauri zarae mendi ezian!

 

 

 

Nik ezin izan nuen Luistxo Fernandezek emandako hitzaldira joan. Askotan zaila izaten da lana eta ikasketak uztartzea eta hori gertatu zitzaidan egun hartan. Egia esan, loari kendu izan dizkiot  orduak beti, baina egun hartan ikasleak zain nituen eta ezin esango nien klase gauez emango niela (gozoak jarriko ziren)!

            Luistxo Fernandezen hitzaldiaren nondik norakoak Joxeren blogean jaso ahal izan ditut. Tagzania oso baliagarria dela klaseak bertan ikusi genuen baina ikasleak ez ezik, dirua dutenak ere konturatu direla esango nuke. Gustura izango da Luistxo Tagzania proiektua nola hedatzen ari den ikusita ( yahoo eta Microsoft mapekin ere lan egin, GPS ibilbideak).

            Luistxoren bizitzari buruz Joxek egindako sarrera irakurtzen aritu naiz gero. Honek, mezularia saioarekin izandako gorabeherak irakurtzera eraman nau. Nik maiz entzuten dut saio hori HUHEZItik etxera bidean. Saio gustuko dut baina arrazoia eman behar diet kritikei, ni neu ere konturatua bainintzen. Hala ere, ez dut uste mezularia denik sareari erreparatzen ez dion bakarra.

            Euskadi irratian blogintzari (hala esaten diote haiek) eskaintzen dioten tarterik interesgarriena gauetan izan ohi da, Susana Mujikak zuzentzen duen Deja vu saioan. Agian baieztapen gogorregia izan da honakoa eta ez dut arrazoirik, baina ordu ugari ematen ditut egunean irratia entzuten eta gustu handiz entzuten dut Susana Mujikaren saioa.

            Amaitzeko, Luistxori zorionak eman nahi nizkioke, sinisten duzun lana aurrera doala eta hedatzen ari dela baino gauza gustagarriagorik ez badago ere.

Nik ere Firefox instalatu nahi dut. Hori izan zen Joxeren azalpena enrtzun ostean esan nuen lehenengo gauza. Hurrengo goizean, lanera iritsi eta tartetxo bat izan bezain laster instalatzeari ekin nion. Egia esan, Internet Explorer ere erabiltzen jarraituko nuela nahiko argi nuen, zaila baita egun batetik bestera ohiturak erabat aldatzea. Bi egun beranduago berriz, hain nengoen gustura, nire bulegokideei firefox instalatzeari ekin niola. Zoratuta nengoela esan zidaten hasieran, baina gustura dabiltza orain.

Ni gehien erakarri ninduena euskalbar izan zen. Itzulpenak egiten aritzen naiz eta maiz-maiz erabili ohi ditut hiztegiak. Joxek euskalbar loturarekin hiztegiak nola kontsulta zitezkeen erakusten ari zenean begiak zabal-zabalik izan nituen, hain da erraza… Nik orain artean, internet explorer erabili dudanez, gogokoak atalean eduki ditut hiztegi horiek guztiak.

            Benetako aurkikuntza izan da niretzat. Testigantzak irakurrita, ondorio nagusia euskaraz erabili ahal izatea guztien begiko dutela esan genezake. Nire ideia sakontzen dutenak berriz, hiztegiak erabiltzeko erraztasuna, ugari dira, Iban Arantzabal eta Asier Irizar besteak beste.

            Ni ez naiz ordenagailu munduan aditu baina benetan diotsuet, emaiozue aukera bat firefox nabigatzaileari eta biziki eskertuko duzue.

 

Gorrotagarriak dira spam mezuak. Nik neuk, biziki gorroto ditut. Zenbat denbora galdu ohi dugu astelehenetan horrelakoak ezabatzen? Astean zehar gutxiago izaten dira baina astelehenetan lanera iristean lehenengo lanetakoa izan ohi da hori. Hala ere, zer egingo diogu ba…azkenean, hizketaldirako tartetxo bihurtu dugu hori gurean eta kitto, ez dugu hori arazo larri, ez oraingoz behintzat.

Uler dezaket une jakin batean spam batek norbait haserraraztea baina ez dakit zer esan ba… gauzak horrela hartzea ere… elkarte ezagun bat tartekari izatea ez da gustugarria, ez noski. Are gutxiago elkarte hori Euskal Herrikoa bada.

Nik beste bide batetik bideratu nahi nuke gaia: zer helburu dute spam mezuek? zertarako bidaltzen dizkigute? Niri ez dut arazo izugarria lortzen horrelakoak jasotzea baina nik uste, horiek jasoko baditut norbaitek igorriak izan behar direla. Nork ematen du eguna horrelakoak sortzen? Zergatik? Zertarako? Ez dakit honi benetako erantzuna ematen baina bi aukera besterik ez zaizkit bururatzen: jendea izugarri aspertzen da edo munduarekin haserre dagoen jendeak gainerakoak ere munduarekin haserraraztea dute helburu.

Ea inork ni laguntzeko aukerarik duen…eskertuko nioke eta.